Shillong, Nohprah 13 : Ka KHADC ha ka sngi Balang ka la shim ïa ka rai ban don noh la ka jong ka Medical Allowances na bynta baroh 800 ngut ki nongtrei jong ka khnang ba kin ym khuslai shuh haba ki kynduh ïa ka pang ka shitom kumba ki la ju mad ha ki snem ba la dep.
Ïa kane la rai ha ha ka jingïalang jong ka Executive Committee kaba long ha kane ka sngi Balang.
Na ka liang u CEM, Bah Pynïaid Sing Syiem haba kren bad ki lad pathai khubor u la ïathuh ba na ka EC kan tehlok bad ka State Bank of India na ka bynta ban pyntyllun ïa katei ka Allowances ha kaba ka Council hi kan pynlut ïa ki jingsiew kumba ka dei.
“La 70 snem ba don ka KHADC ki nongtrei jongngi kim pat ju ïoh ïa kum kane ka jingïarap. Kumta ha kine ki san bnai ba ngi don ngi la lap ba ki nongtrei ki kynduh bun ki jingeh khamtam haba ki ngat ha ka pang ka shitom ba ki hap ban leit shah sumar shabar jylla ryngkat ka jingbankhïa ka jinglut jingsep,” u la ong.
Dei na kane ka daw, u la ong ba kum ka EC ka la rai rangbah ban ïatrei lang bad ka SBI ha kaba kin ai ïaka special group insurance package bad ïa ka jingsiew (premium) ka Council kan sa siew hi.
U la ïathuh ruh ba ka jingmyntoi ba ki nongtrei kin ïoh na katei ka allowance kan long 3lak haduh 7 lak tyngka ha ka shisnem tangba kan long katkum ka rta jong ki.
La ïathuh ba la bthah ruh ïa ka SBI ban treilang bad ki hospital kiba biang ym kum ka MHIS ha kaba ki don ki hospital kiba ym pdiang ïa ka MHIS shabar ka jylla.
U ong ba ka EC kan peit ruh ba ka SBI kan kdew ba ki jaka sumar ba ka SBI ka tehlok kin dei kiba biang la ka long ha ki bynta jong ka thain shatei lam-mihngi jong ka Ri lane wat ha kiwei kiwei ki bynta jong ka Ri.
