Nongpoh, Ïaïong 16: Shi sngi hadien ba la lap ïa ka met jong u Hati ba la ïap ha kawei ka khlaw ha 14mer, Byrnihat ba la suba ba u ïap na ka jingshah bat ha ka bording ilektrik, ka tnad Wildlife ha ka sngi Balang ka la pynkhuid noh ïa ka met jong une u Hati da kaba shu thang ha ka ding.
Kum ba pynkynmaw, ïa une u hati ba la thiah ïap ha khlaw la lap hynnin ka sngi Baar da ki nongshong shnong ka shnong Kamurkuchi, Byrnihat, kiba la pyntip sha ka tnad tnad Wildlife bad dei hadien ba la pynlong ïa ka jingtohkit bad ba la pyndep ïa ka Postmortem la thang noh ïa ka met jong u Hati.
La sakhi lang ruh ha kane ka sngi ba la thang ïa u Hati da ka jingdon lang u DFO ka wildlife u Sachin Gavade, u Range Forest Officer u Bah Leening Wahlang RFO, u Dr. Duwaki Ryngad, Assistant Professor ka St.Edmund College, ki doctor na ka tnad Veterinary lem bad ki nongtrei na ka tnad Wildlife.
Haba kren sha ki lad pathai khubor u DFO ka tnad Wildlife u la ong ba ka tnad Wildlife ka la thang noh ïa ka met une u Hati katkum ki kyndon jong ka Wildlife Protection Act bad la leh ruh katkum ki kyndon khnang ban pynthikna ba yn ym don kiba shim kabu ban khlong ïa ka met ne ot ïa ka bniat lada shu tep ha khyndew bad dei namar kane ka daw la shu thang noh ïa ka met jong u Hati.
U la ïathuh ruh la thang ruh ïa ka met u Hati hadien ba la pyndep ïa ka postmortem examination da ki doctor ha kaba ïa mynta kim pat lah ban ai ïa ka kaiphod hynrei la shu suba ba u Hati u la khlad na ka jingshah bat ha ka bording ilektrik.
Ha kaba ïadei bad ka jingïap jong u hati u la pynshai ruh ba u lah ban dei u hati ba wad bam bad ka kynhun hynrei u la ngat noh ha kane ka jingshah bat ha ka bording ilektrik.
Ban pyntikna ban ym buh jingma ïa ki mrad bad wat ïa ki briew ka tnad Wildlife kan sa ïakren bad ka MeECL ban pynkhuid bha ïa ki sainar bording iletkrik khnang ba kum kane ka jingjia kan ym jia shuh hadien habud, u la bynrap.
