Thalaiñ ki Liang Pyrshah ïa ka jingleh palat pud ki Pulit ïa ki paidbah ha Thangskai, ïada u HM

Shillong, Nailur 19: Ki Liang Pyrshah mynta ka sngi, ki la thalaiñ tyngeh ïa ki Pulit ka jylla namar ka jingthombor bad ka jingpyndonkam palat pud jong ki ïa ka bor ha kaba ïadei bad ka jingïakhih ki paidbah ha Thangskai ha ka 24 tarik u bnai baladep bad ka Seng HITO ha ka 4 tarik mynta u bnai.
Kane ka long lyngba ka Special Motion ba la wanran da u MLA ka Mawlai, u Bah Brihstarwell Marbañiang hapoh ïingdorbar Thawaiñ mynta ka sngi. U Bah Bright, haba wanrah ïa kane ka Motion, ula ong ba ki Pulit ki la pyndonkam bakla ïa ka bor bad kim shym la bud ruh ïa ki kyndon kiba don ha ka jingtreikam ki Pulit, kat haduh ba ki paidbah kiba pynlong da ka jingïakhih kaba jai jai khlem tiar khlem tiar ki la shah bom shah tied, kynthup ïa ki kynthei briew ruh.
U MLA ka VPP, u la ong ba ka jingshisha ha ka Public Hearing ki paidbah kiba pyrshah kidei ban ïoh lang ka lad ban pynpaw ïa ka jingsngew jong ki. Hynrei ha kane ka jingpynsngew paidbah ba pynheh ïa ka Meghalaya Cements Limited, ki Pulit ki la khanglad ïa ki paidbah ban rung shapoh bad dei kane kaba la pyndom, ïa ki paidbah. U Bah Bright i la sot ruh ïa ki kyndon treikam jong ki Pulit bad ïa ki rai jong ka ïingbishar ban kdew ba ki Pulit ki la pyndonkam palat pud ïa ka bor jong ki, kumba ki la leh ïa u Bah Cherish Thangkhiew ha ka 13 tarik u Nailar ka snem 2021, kumba la lap ruh da ka Inquiry Comission. U la dawa ruh ba ka sorkar kadei ban siew bai luksan ïa ki paidbah kiba la mynsaw bad u pan jingshai hato kaei kaba ka sorkar ka la leh ïa ki nongtrei ka MCL kiba la ïoi lyngba ki Video ba ki la pynshit ïa ki Pulit ban bom ban tied ïa ki paidbah.
Ïa kane ka Motion la kyrshan ruh da u Bah Ardent Miller Basaïawmoit, uba la pynpaw pat ïa ka jingleh ki Pulit ha ka por ba ïakhih ka HITO ha Shillong ha ka 4 tarik mynta u bnai. U Bah Ardent u la kdew ïa ka jingkawang Stun Grenade jong ki Pulit ha katei ka sngi ïa kawei ka dukan die sha. Nangta u Bah Ardent pynpaw ruh ka jingsngewkhia ïa ka jingpyndonkam uwei u heh Pulit da ki tien sih hakhmat ki paidbah. U MLA Nongkrem, u la ong ba ha ka jaitbynriew Khasi wat ïa ki riew paidbah ruh bun kim sngewtynnad ba kin pyndonkam da ki tiensih, katno tam ïa u briew uba don ha ka Uniform.
U nongïalam ka VPP, u la kynnih ruh ba ki Pulit kiba don duty ha katei ka sngi ha Thangskai, i kumba ki leit duty na ka bynta ki heh spah nongseng karkhana ha East Jaiñtia Hills ym na ka bynta ka sorkar.
U Bah Charles Pyngrope, MLA ka TMC na Nongthymmai, u la kdew ïa ka aiñ jong ka Parliament ha u snem 2013 kaba kdew ba dei ban ai bai luksan ïa ki paidbah kiba ïakynduh ïa ki jingmynsaw na ki PublicHearing kiba kum kine.
Kiwei kiwei pat kiba ïashim bynta ha kane ka jingïatai ki long u Dr. Mukul Sangma jong ka TMC, u Bah Adelbert Nongrum jong ka VPP.
Haba jubab ïa kane ka jingïatai, u Bah Prestone Tynsong, Myntri ka tnad kam pohïing, u la ong ba ki Pulit ha katei ka sngi ha Thangskai ki la don naduh ka por 6:30 mynstep. Shuwa ban sdang ka PublicHearing la don katto katne ngut ki briew kiba la wan ban pynpaw ka jingpyrshah ïa ka jingthmu pynheh treikam ka MCL. Hynrei katba nang slem ki paidbah ki la nang bun ha kaba la don kiba wan na Cheruphi, Wahiajer bad ia pyrta pyrshah ïa ka Public Heariing hapoh ka jingïalam uwei u briew. Hadien ka jingïapyrshah ki paidbah kiba don kumba shispah ngut eiei la pynkynriah noh ïa ka Public Hearing sha phyllaw jong ka MCL. Hynrei ki paidbah ki la ïaleh ban rung jubor shapoh bad don ruh kiba la kiew ïa ki kynroh ba la ker ïa ka MCL. Nangta don ruh kiba la pynjot pynpra ïa ka dara kaba la shna ban pynlong ïa ka Public Hearing bad dei namar kane ka daw ba ki Pulit ban pynpra ïa u paidbah ki la pyndonkam da ki lathi ban bom.
U Symbud Myntri Rangbah um shym la pynshai pat la ka sorkar kan siew ne em ïa ka bai dawai ne bai luksan jong ki paidbah kiba la mynsaw bad um shym la ong eiei pat halor ka jingkynshoit bad pynshit ki nongtrei ka MCL. U la shu ong ba ka sorkar ka la shimkhia ïa ka jingpynpaw ki dkhot ka ïingdorbar bad kan sa leh ïa kaba donkam.