Nongpoh, Ïaiong 19: Ka kur Syiem jong ka Raid Nongtluh mynta ka sngi kala plie paidbah syndon ïa u mot sahnam jong u Chak Syiem, u ba dei u Syiem bad u khlawait ka Raid Nongtluh ha u snem 1858, ha phyllaw ka ophis jong u Syiem ka Raid Nongtluh, kaba don ha ïew Umden bad ïa u tei u mot sahnam la tei da ka Dorbar Kur Syiem, Raid Nongtluh.
Ïa utei u mot sahnam la plie paidbah da u Bah Mayral Born Syiem MLA ka Nongpoh kum u kongsan, haka jingdonlang u Pa’iem Vincent Eng Syiem, Syiem ka Raid Nongtluh, ki kñi, longsan mansan, lem bad ki longkmie longkpa lem bad ki samla jong ka kur Syiem ka Raid Nongtluh.
Kum ban shu kdew hangne, u Chak Syiem u khun ka Ngap u la kiew ïaka khet bad synshar tang shisnem, kata ha u snem 1858 haduh 1859 bad u dei u syiem ba 4 jong ka Raid Nongtluh, bad ïa u la tip kum u khlawait ka Raid Nongtluh hadien ba ka Nongtluh kala jop ïaka thma ban ïakhun pyrshah ïaki khlawait bad ki paid ïapom ki Thaiang kiba la hiar thma ha kitei ki snem.
Ha katei ka juh ka sngi naka liang ka Kur Syiem jong ka Raid Nongtluh kala pynkup burom ruh ïaki khun samla jong ka kur kiba la wanrah ïaka nam bad burom haka pule ka puthi bad kumjuh ruh ki kam ïalehkai sports bad kiwei kiwei ki bynta.
Haba kren ha katei ka sngi naka liang u Bah Mayral Born Syiem u la ong ba kane ka dei ka sngi ba sah jingkynmaw ba kum ka Kur Syiem hi kala shim ïaka sienjam ban pynsahnam bad kynmawburom ïa u Chak Syiem u ba la tip kum u khlawait ka Raid Nongtluh, bad kane ka long ruh kum ka jingbuh beit buh ryntih ïaki khana bad ki history jong ki longdien kiba la don ka bynta ba khraw haka imlang ka sahlang bad ka Raid Nongtluh baroh kawei.
U la ong ruh ba ka long kaba kongsan ban tip ïaki longdien, ban don da ki jingthoh la ka long haki Raid bapher bapher ba kan nym kut tang haka jingïakren la ki long ki riti ki dustur, ki khlawait ban rung ruh hapoh ki aiñ jong ka District Council.
U la kyntu ruh ïaki khun samla ha kane ka juk mynta ban ïaid shaka lynti kaba dei ba ka waitlam arliang syrti haka jingim ka dei tang ka jingsngewrit bad ka jingïaishah namar kine ki dei kiba lam lynti sha ki kyrdan jong ka nam, ba kum ki khun samla khamtam ha kane ka juk ba mynta ba jur ki kam sniew naduh ka mobile haduh ki jingdih buaid, kim dei ban ngop hynrei ban im tip sngi, tip briew tip blei bad khamtam ban minot thop haki jingpule.
