Teh lama ïong ka KSU bad FKJGP EJH ha Khliehriat, dawa ki seng ban buh Police Outpost ha khappud

Khliehriat, Naiwieng 23: Ki nongïalam bad ki dkhot jong ka Khasi Students Union bad Federation of Khasi, Jaintia and Garo People East Jaiñtia Hills District, mynta ka sngi ki la pynlong ïa ka jingteh lama iong ha Khliehriat hajan ka ophis u Deputy Commissioner, kane ka long ban pynpaw ïa ka dak ka jingpyrshah bad pynrem jur ïa ka jingleh riew khlaw ki pulit Assam kiba la siat pathar ïa ki paidbah ha shnong khappud ha Mukroh West Jaiñtia Hills District ha kaba haduh san ngut ki ki iap bad ar ki la mynsaw.
Ki nongïalam ba la lam khmat na ka KSU-EJHD ki kynthup u President u bah Streamly.S.Suchen, u General Secretary, u bah K.S. Suchiang, u Assistant Finance, u bah C.Suja, President KSU Ladrymbai Unit, u samla Donbok Mukhim, lem bad ki dkhot, na ka liang ka FKJGP East Jaiñtia Hills, la lam khmat da u President, u bah Mac Meral Suting, u General Secretary, u bah Deihok Sumer lem bad ki dkhot.
Ka seng ka dawa na ka sorkar kaba hapoh ka jingïalam u Conrad Sangma, ba dei ban ïa pynbeit noh mardor ïa kine ki kynrum kynram kiba mih hapoh ka jylla, lem kumta ka seng lem bad ki paidbah kin shim da kawei pat ka lynti.
“Ka seng na ka por sha ka por ka la ju dawa ba dei ban buh ïa ki police outpost ha ki jaka khappud, hynrei ka sorkar ka kheiñ dew thala ïa kine ki jingdawa ka seng, ka jingjia kaba la jia mynnin ka sngi ha Mukroh ka dei na ka daw bym don ki police outpost jong ka Meghalaya, na kata ka daw ki pulit Assam kin sa wan ban thom bor ïa ki para doh para snam jong ngi, ka khubor sha ka sorkar ka long ba lada ka dang shim sting ban pahara ïa ki khappud, ka seng kan sa shim da kawei pat ka lynti ban pyrshah ïa ka sorkar, namar ngim hun ba ki paradoh para snam kin duh ei ïa ka jingim, ngi kyntu jur ïa ka sorkar ba kan shim ia ka jingkitkhlieh halor kane ka jingjia, mynta ka la dei ka jingiakhi jaitbynriew ym dei shuh ka jingiakhih sengbhalang” la bynrap u bah S.Suchen.
Kumjuh ruh u bah K.S.Suchiang u la ong “Ka jingshah siat ki para doh ha shnong Mukroh, ka dei ba ka KSU kam lah ban pdiang da lei lei ruh bad ngin nym lah ban klet ïa ka snam ba la tuid jong ki para doh para snam jong ngi hangtei bad ka kamram jong ngi mynta ka dei ka kput, ngi kyntu ïa ki nong shong shnong ha Mukroh ba kin pynkhreh ïa u khnam bad ka ryntieh namar ngim lah shuh ban shaniah ïa ka sorkar Assam bad ngim shaniah shuh ïa kane ka sorkar MDA jong ngi bad ïa ka tnat pulit jong ka Meghalaya” u la ïathuh ruh ïa ka jinglong khawpud ki pulit Meghalaya kiba don ha Mukroh ki bym shym la ïada ïa ki paidbah hynrei ki phet krad pynban, ha ka jaka ba kin pynphai kuli lem ïa ki pulit Assam hynrei ki phet krad pynban “Kumta kane ka jingjia ka pyn kyndit thiah shuh shuh ïa ngi ba ngim dei shuh ban shong kli kti hynrei ngin pyni noh da ki kam” bynrap u bah Suchiang.
Kumjuh ruh u General Secretary ka FKJGP East Jaiñtia Hills District, u bah Deihok Sumer, u la ong “Ngi pynrem jur ïa ka sorkar MDA, namar ngi ïohi ïa ki kam jong ka soarkar kaba wanrah ïa ka roi ka par bad plie ïa ki tnat bapher bapher, hynrei balei ka long kaba eh pat ïa ka sorkar ban plie ïa ka Police Out Post kaba pura ha Mukroh ka ban long ka lad ban ai jingiada ïa ki briew ha katei ka thaiñ, ngi pynrem ruh ïa ka tnat pulit namar lada ïakhih ki sengbhalang ki da shim khia bha ban thwet ban bud dien bad khot hajir ruh halor ki kyndon ba ki pyn ngat hynrei sngewsih pat ba ki pulit ha ka jaka ba donkam ki long ki khawpud na ka bynta ban ïakhun ïa ka hok ka jaitbynriew, na kata ka daw na ka liang jong ngi ki ar seng, ngi pynpaw ka jingsngewsih bad kyntu jur ïa ka tnat pulit ba kaei kaba ki don ban leh halor kane ka jingjia namar kane ka dei ka mat jong ka jylla ha kaba ka sorkar ka dei ban shim khia namar ka jingaïaleh ka long bad kawei pat ka jylla” ha kajuh ka por u la phah ruh ïa u kyrwoh sngewlem sha ki ba ha iïng ha sem jong ki lanot kiba ngat ha kane ka apot ba u Blei un phah ïa u mynsiem ban pyntngen ïa ki “ka snam kaba tuid kan nym kut hynrei kan ïai pynrhem ïa ka mynsiem jong ngi ki samla kiba ïaleh ïa ka hok jong ka ri bad ka jaitbynriew bad nangne sha khmat ngi long kiba la khreh ban ïaleh, namar ngi ïohi ba ki paidbah ki phai khmat sha ngi ki sengbhalang haba ki don ha ki jingeh”
Kumjuh ruh na ka liang u President ka FKJGP East Jaiñtia Hills District, u bah Mac Meral Suting, u pynpaw ka jingsngew sih bad pynrem jur ïa ka jingleh ki pulit Assam ha Mukroh bad ong ba kane ka pyni shai ba ki pulit Assam na ka por sha ka por ki la ibeiñ bad leh beiñ haduh ban pyniap ïa ki para doh para snam, na ka liang ka seng ka buh ka khubor sngewlem ïa ki bah ha iïng ha sem bad kyntu ruh ïa ka sorkar ba kam dei ban don ka jingpyrkhat tang ban kamai lum spah hynrei ban pyrkhat ïa ki paidbah ruh khamtam kito kiba shong ha ki khappud ban wanrah ïa ka shong suk shong shngaiñ ban lai na kino kino ki jingjia ba sngewsih, u pynrem ruh ïa ka jingleh ka tnat pulit Assam bad ka tnat pulit Meghalaya, u kyntu ruh ia ka sorkar ban ai ïa ka jingbishar ba hok jong kito kiba iap ha kane ka jingjia.
Kum ka khubor sha ki paidbah kiba ha ki khappud, ki nongialam jong kitei ki ar tylli ki seng na East Jaiñtia Hills District, ki la pynpaw ruh ba ki ïai don lang ryngkat bad ki paidbah ha kano kano ka por ba ki donkam bad kyntu ruh ïa ka sorkar ba ka dei ban weng noh kloi ïa ki jingeh ha ki jingkajia khappud bad wanrah ïa ka shongsuk shong shngaiñ ha ki shnong ba ha khappud.