Nongpoh, Naiur 06: Ha kawei ka jingjia twa khyndew, kawei ka dukan bad ka iing kaba don harud surok bah National Highway-6 haka shnong Shangbangla ha Ri-Bhoi District kala shah tap haka khyndew bad ki siej hadien ka jingther u lapbah bala neh bun kynta hynnin ka miet bad donbok ba ha katei ka jingjia, u kpa, ka kmie lem bad ka khun kila lait naka jingmynsaw bad ka jingjia ba sngewsih.
Kane ka jingjia kala jia hynnin ka miet haka por kumba 8 baje eiei namar ka jingther u lapbah ka khyndew nalor lum kala sdang ban jem bad jraiñ kala hap bad tap beit ïaka iing bad dukan jong u Bah Teiborlang Wahlang bad ha kane ka jingjia baroh ki jingdon jingem naduh ki tiar ki tar, ki soh ki pai bad kiwei kiwei ki mar ba die ha katei ka dukan kila duh lut.
Naka liang u Bah Bishos Lawriniang Rangbah Shnong ka shnong Shangbangla u la ïathuh ba katei ka jingjia kala jia dei namar ka jingther u lapbah bad donbok ba kam don kano kano ka jingmynsaw bad ngat ïaki briew, hadien ba ki trai dukan bad trai iing kila mih noh wut wut shabar na ka jingsawa kaba mih naka jingtwa khyndew hynrei la ngat tang ïaka iing bad ka dukan.
U la ïathuh ruh ba ha katei ka shnong ki don kumba 20 tylli ki longiing kiba shong ba sah harud surok kiba don hapdeng ka jingma kaba lah ban ktah naka jingtwa khyndew bad kyrpad ruh sha ka sorkar ba kan leh eiei ban thaw ki lad ki lynti ban ïada bad ban lait na kano kano ka jingjia ba sngewsih hadien habud.
