Tang naba ai khublei ïa u Conrad ba ïoh mining lease, pynduh tiket ka VPP ïa u Bah Marbiang

Nongstoiñ, K’lyngkot 15 : Ka jingdon ka video kaba pyni tyngkreiñ ba u bah Marbiang Nongsiej u la ai khublei kyrpang ïa u Myntri Rangbah ka Jylla u Conrad Sangma, hadien ba u la ïoh ka mining lease ha u snem 2021, ka dei ka daw ba kongsan ba ka Voice of the People Party, ka la bujli noh ïa u bah Marbiang Nongsiej da u Doctor Jurisman Ïawphniaw ban long u kyrtong ka party na Nongstoiñ sha ka elekshon jong ka KHADC.
Ïa kane la kren pynshai da u Bah Ardent Miller Basaïawmoit President rangbah ka party ha ka jingïalang pynshai paidbah ha ka jingïalang kaba la long ha ka sngi Balang hakhmat ïew Nongstoiñ.
U Bah Ardent u la ïathuh ba ka jingsaphriang jong ka video ka la pynlong ïa ka party ban rai da kumwei, ïoh ba kan don kano kano ka jingktah ïa ka party hadien habud khamtam hadien ba phriang ki khubor ba utei u rangbah u dei uba don bynta ha ki kam kam khaïi dewiong.
U la ong ba ka rai ban pynduh tiket ïa u bah Marbiang, ka la wanrah ruh ïa ka jingkynthoh ba ka party ka la leh donbor ha kine ki khyndiat sngi. Kumta na ka liang u Bah Ardent u la pynshai ia ka daw ba la hap ban weng noh da kaba ong ba ka VPP ka dei ka sur jong ki paidbah, ym jong ki briew shimet.
Haba ai jingkren u la ong, “Ngi khlem don daw ei ei halor u bah Marbiang Nongsiej, hynrei ka la don ka jingkren sharum shaneng ba uta u Marbiang Nongsiej, u don bynta ha ki kam khaïi dewiong lane u don ha ka kyrdan high level. Haba u wan sha ngi u wan da kaba ong ba em um don bynta ha kita kiei kiei bad u thrang ban shakri ïa ka ri bad jaidbynriew. Dei halor kata ka nongrim ngi sngew ba dei ban ailad ïa u watla hapdeng ki jingkynthoh bad jingkren na kiba bun halor une u candidate”.
“Hynrei, watla hapdeng ba ngim shym la pynsngap, bluit mih ka video kaba la saphriang ha ki social media kaba la pynmih ba u Bah Marbiang Nongsiej lem bad u paralok, ba ki la ai jingkren bad pynpaw ba ka jingsngewnguh ïa ka sorkar MDA lyngba u Conrad Sangma, namar kata ka jingïoh lease lane laisen tih dewiong. Kane ka video ka la mih ha u snem 2021”.
“Kane ka pynlong ïa ki nongïalam ka VPP ba watla ngi la dep rai ruh, hynrei ban pyrkhat ba kane kan ktah khlem artatien ïa ka nongrim jong ka VPP. Ngi sngewthuh shai ba kane ka dei ka shrip kaba ki la pynap lypa ïa ngi ban ïoh ban khyrwit ïa nga bad ka party”.
“Haba ngi ïoh jingtip halor kane, kum ki briew kiba sngewthuh ngi la khot ïa u Bah Marbiang ban ïakren halor kaei kaba ka video ka mih. Nga la dep kren shai ruh ba kane ka kam kan pynjahburom shisha. Nga la dep ong da kaba shai hi markhmat u bah Marbiang, ba kan ktah ïa ka party bad nga sngewthuh ba ka dei ruh ka jingpynap shrip ïa ka party lada ngi bakla. Da kane ka video kin sa shna video bun jait tang ban ïoh pynthohbria ïa ka VPP”.
“Ngi dei tang ki briew kiba duna ha baroh ki bynta bad ngi bakla ruh, hynrei haba don ka thong ban trei hok na ka bynta ka ri bad ka jaidbynriew, ngin ieng skhem ha ka nongrim na ka bynta ka jaidbynriew, ban pynbha pat ban tei pat bad ban pynkylla dur”, ong u Bah Ardent.
U bah Ardent u la pynkynmaw ruh halor ki nongrim ba ka VPP ka don na ka bynta ka ri bad ka jaidbynriew. U la ong ruh ba ka jingjop MP ka dei tang ka jingsdang ha ka jingiakhun ban wanrah pat sa shisien bad ban kyntiew biang ïa ka jaidbynriew kaba ieit eh. Nangne shakhmat ki jingeh jingtynjuh kin nang bun na baroh ki liang, ka donkam namarkata ban duwai ba u Blei un da sngew bad jubab ban im ka Ri bad ki pateng ban wan.
Ha kane ka sngi nalor ki nongkren bad nongïalam ba hakhmat eh ka party, kiba la pynshai halor ki nongrim ka party la ïoh ruh ban pynithuh kyrpang ïa u candidate na Nongstoiñ kata u Dr Jurisman Ïawphniaw, u Doctor sumar briew, u ba la ïoh ruh ka lad ban kren katto katne kyntien kum ka jingpynithuh ïalade hakhmat ki paidbah ha iew Nongstoiñ.