Tang marwei phin ym lah ban leh hynrei baroh lang ngi lah ban wanrah ïa ka khuid ka suba : Bah Sniawbhalang

Shillong, Risaw 02 : “Ym don mano mano uba lah ban leh ïa kane marwei, hynrei lada ngi ïa tylli baroh lang ngi lah ban leh ïa ka,” ong u Symbud Myntri Rangbah ka Jylla, u Bah Sniawbhalang Dhar, ha ka Sngi Thohdieng haba kaweh pyrda ïa ka prokram pynkhuid shnong kaba jrong haduh 100 kilometer.
Ïa kane u Symbud Myntri Rangbah u la kren haba shim bynta ha ka prokram pynkhuid shnong paidbah kaba sdang naduh Nongpoh bad kut pat haduh Sohra ïa kaba la pynlong da ka Directorate of Urban Affairs hapoh ka Swachh Bharat Mission ha Mawlai- Mawïong kum shi bynta jong ka prokram pynkhuid ïa ka ri baroh kawei, ka Swachhata Hi Seva 2026.
Ïa kane ka prokram la pynlong hapoh ka phang, “Ek Din, Ek Saath, Ek Ghanta” (Shi Sngi, Baroh lang, Shi Kynta). Ha kane ka prokram ki la don bynta ki khynnah skul, ki kolej, ki Dorbar Shnong, ki seng bapher bapher, ki tnad sorkar bad kiwei kiwei.
U Symbud Myntri Rangbah u la ong ba ka Swachh Bharat Mission kam dei tang ka prokram pynkhuid hynrei ka dei ka jingkhih paidbah kaba thmu ban pynrung ïa ka jingdon ïa ka jingkitkhlieh jong ki paidbah ha ka imlang sahlang.
“Kane ka prokram ka thmu ban wanrah ïa ka jingkylla ha ka jingkhuid bad ka sawdong sawkun ha Meghalaya lyngba ka jingïashim bynta lang jong baroh bad ka jingkylla ha ka rukom pyrkhat jong ki paidbah,” u la ong.
Shuh shuh u la ong ba ka sorkar jylla ka wad ki lad ban pynkhlaiñ ïa ka jingïatreilang hapdeng ki tnad sorkar la ka long ha sor bad nongkyndong, ki samla, ki kynthei bad ki skul, khamtam eh ha Shillong, khnang ban pynkhlaiñ ïa ki kam pynkhuid.
Haba ban jur ïa ka jingdonkam ban pynlong ïa ka jingkhuid kum ka jingmlien, u Bah Sniawbhalang u la ong ba bunsien ki briew ki ju leh da ka rukom kaba pher haba ki leit shabar Meghalaya, namar ba ki jaka ki khuid bad ki briew ki don ïa ka rukom sumar kaba phikir ïa ki jaka paidbah.
U la ong ba ka sorkar ka kwah ban pynlong ïa ka jingkhuid kum kawei na ki kam ba ki paidbah ki dei ban leh man ka por. “Ka sorkar ka kyntu ïa ki paidbah ban shim ïa ka jingkitkhlieh ban sumar ïa ki surok, ki shnong, ki sor rit bad ki sor jong ki, ym ban iehnoh ïa kane ka kam tang ha ka sorkar.”
Haba kren shaphang ka jingpynkhuid kaba jrong haduh 100 kilomitar, u la ong ba kane ka dei ka nuksa jong ka jingïatreilang bad ka jingïashim bynta lang jong baroh. “Kane kan pyni ïa ka jingkut jingmut jong ka Meghalaya ban pynkhuid bad pynitynnad ïa ki jaka paidbah,” u la ong.
Ha kane ka prokram ki la donlang u Secretary jong ka Sorkar Meghalaya, u SC Sadhu; u CEO jong ka Shillong Municipal Board, u PK Boro; u BDO jong ka Mawlai C&RD Block; ki ophisar CRP; ki khynnah skul; ki nongshong shnong ka Mawlai-Mawiong bad kiwei kiwei kiba don bynta ha kane ka prokram.