Ha kine ki sngi la ïohi ïa ka jingud jinglynñiar jong ki paidbah ka jylla ha kylleng ïa ka jingsniew jong ki surok kaba la ktah shibun eh ïa ka leit ka wan bad ka kit ka bah jong ki paidbah. Ym kham lap shuh ban ong ba ki don ki dong ki thaiñ ki by mud shuh ïa ka jingsniew jong ki surok, la ka long ha ki jaka sor ne wat ha ki jaka nongkyndong ruh. Ha ka jingshisha ka sorkar la ka jong ka sorkar jongno jongno ruh, ki ju ong ba ka Surok ka long kum u thied snam ïa ka met u briew. Pynban kane ka jingkren ka shu long tang ka jingkren kaba na sla bad kaba ym dei satia kaba mih na ka tyllong ka dohnud.
Ka jingshna ka sorkar ïa ka surok naduh Shillong sha Dawki kaba mynta ka la ïaid la katto katne snem, ka la long ka jingjynjar ïa ki paidbah nongleit nongwan namar ka jingslem palat ban pyndep ïa kane ka surok, khamtam kadei ka surok kaba ïaid bun bha ki kali namar kadei kaba ïaid sha West Khasi Hills, Eastern West Khasi, South West Khasi, East Khasi bad khamtam sha ki bynta jong ka Sohra kaba ki ïa leit bha ki kali ba kit ïa ki tourist kaba mut ki wan ki kali naduh Assam ruh. Ha kane ka surok, la jan man la ka sngi ka don ka jingsahkut ne ka dheng kali kaba jur haduh ba la isynei khait ïa ki paidbah. Ki paidbah ba pang ba shitom, kiba wan shim dawai, kiba beh ki kam ba kyrkieh ki mad ïa ki jingeh kaba ym don hi ruh mano kano ban ïohi ne sngewthuh ïa ka jingeh ba ki mad ha ka lynti ïaid jong ki. Mynta ruh ym tip lano kane ka surok kan dep noh bad ki dak ki shin ki paw ba kane ka surok kan dang shim por sa katto katne snem tad haduh ban da lah ban pyndep naduh Shillong haduh Dawki. Wat ha ka bynta kaba kongsan eh kum na Shillong sha Upper Shillong ruh ki dang bun ki bynta ki ba dang sahkut bad bym pat sdang.
Sa kawei pat ka jingjakhom ki paidbah ha ka liang ka surok kadei ha ka surok NH 6 ha ki bynta jong ka East Jaiñtia Hills District, khamtam ha ki bynta jong ka Elaka Narpuh. Kane ka surok te ka la ktah palat shisha ïa ki paidbah namar ka dur ka dar jong ka surok kam idei shuh kata ka surok ïaid kali, ka la i kum ka surok kulai. Ki thliew kiba heh ki la don hapdeng surok, ki nala ki lah twa lut bad ym don hi ruh kawei ka stretch ba ka surok kan bha. Ki kali kiba ïaid ki la shu sahkut hapdeng surok namar bym lah shuh ban ïaid. Ki don kiba la shu kylla hapdeng surok. Kiba bun ki briew mynta ki ïaleh ban kiar ban leit lyngba kane ka surok, tangba kim banse ban leit la ka leit haba shah eh ka kam. Mynta ba la sdang rang ka u slap la sdang sa ka pump um haduh ba ka la ktah ïa ki nongshong dukan harud surok, ki khynnah skul kiba ïaid na surok bad ka la long shisha ka jingsohsat kaba khraw ïa ki paidbah. Ka la mih ka khubor ba ka sorkar pdeng lyngba ka Ministry of Road Transport and Highways (MoRTH) ka la mang 290 Klur tyngka ban moramot noh ïa kane ka surok. Tip lano kan dep kane ka jingmoramot pat, ym tip.
Nangta ka surok kaba leit na Shillong lyngba ka Weiloi sha Mawsynram shaduh Ranikor, kadei kawei pat ka surok kaba ki paidbah ki jakhom bha ka leit ka wan. Kane ka surok lei lada ki phew snem, ka la jot rathai bad ym shym la moramot ïa ka la bun bun snem, lait noh tang ha ki bynta naduh Mawphlang haduh Tyrsad ha kaba ka la don ka jingpynbha kaba malu mala. Hynrei namar ba ka long ka surok kaba rit ki paidbah ki mad ïa kiba bun ki jingeh.
Ban thoh lut hangne ïa ka jingjot ki surok lehse yn ym ngiam jaka hi ruh, namar ba ki la bun palat ki surok kiba sniew bad kiba ki paidbah ki ïakynduh jingeh ha ka liang ka leit ka wan. Ka surok na Nongkhlaw sha Kynrud ruh kadei kawei na ki surok kaba ki paidbah ki la jaw ummat la bun bun snem. Nangta ki surok sha ki shnong nongkyndong lei lei kidei kiba ki paidbah ki la shu ïamih hi ban moramot da kaba tep da ki khyndew ban siang da ki maw tang ban ïoh ban ïaid kali bad ban kit ïa ki nongpang. La ïohi ïa ki shnong sha ki thaiñ Langdondai sha Mawshynrut Civil Sub Division ki la ïamih hi ban shna ne moramot. Ki paidbah sha ki bynta jong ka thaiñ Riwar South West Khasi Hills ki la hao ban ïamih hi ban shna pynbha ïa ki surok. Ha kylleng kylleng ki paidbah ki ud ki lynñiar, hynrei ym ïohi ban don ba ai jingkyrmen ïa ka jingim ba man la ka sngi jong ki ha ka liang ka kit ka bah bad ka leit ka wan. Nangta mynta la mih sa ka jingud na ki trok kit mar ïa ka surok Mawmawram sha Umïam kaba ki trok ki hap ban pyndonkam namar ba la khang ïa ka jingkieng ha Dam Site Umïam. Ha ka jingshisha kane ka surok kadei kaba la shna ban ïaid ki trik kit mar ruh, hynrei namar ba la shna torti ïa ka , tang katto katne bnai ka la jot noh bad haba ïaid ki trik kitmar, ka la ktah kylla pat sa ïa ki paidbah ba leit jingleit.
Yn ong tang shaei bym jot ki surok, wat ha Shillong ruh, ka surok sha NEHU la jot rathai, ka surok sha NEIGRIHMS ruh rathai. Lada ha sor Shillong ki surok ki long kumne, katno tam lei ki surok sha nongkyndong bad yn nym don hi ruh ki ban peit ban sngewlem na ka bynta jong ki.
