Mairang, Jylliew 08: Ka Sorkar Meghalaya lyngba ka tnat Social Welfare Department ha ka jingïatreilang bad ka District Level Nasha Mukt Bharat Abhiyan Committee jong ka Eastern West Khasi Hills, ka la plie ïa ka Nasha Mukt Bharat Abhiyan ha ka 6 tarik mynta u bnai ha Circuit House, Mairang.
Kane ka dei ka national campaign ban ïakhun pyrshah ïa u drug bad ban pynlong ïa ka ri India bad ka jylla baroh kawei kaba laitluid na u drug.
Ha kane ka sngi plie la ïadonlang ka Deputy Commissioner Kong A.Kharpor kum ka kongsan, ha kaba la ïadonlang ruh ka Additional Deputy Commissioner Kong V.Hynñiewta District Social Welfare Officer WKH, Kong D. Pakynteiñ, Additional Superintendent of Police Dr. Hari Prasanth IPS, Sub Divisional School Education Officer Bah J. Thyrniang, ki ophisar na ki tnat treikam ka sorkar bad ki nongïalam balang.
Ka District Social Welfare Officer West Khasi Hills Kong D. Pakynteiñ ha ka jingmaitphang jong ka ha kane ka sngi plie, ka la ong ba ka Nasha Mukt Bharat Abhiyaan ka dei ka campaign ba la pyntreikam ha baroh kawei ka ri India, na ka bynta ban pynduh jait ïa u jingdih ba sniew u drug.
Ka Sorkar India lyngba ka Ministry of Social Justice and Empowerment ka la plie ïa kane ka campaign ha ka 15 tarik Nailar 2020, ban pynshai paidbah halor ka jingsniew u drug bad ki lad ki lynti ban pynbha pat ïa kiba la kyrni ha u drug lyngba ki lad ïada, ka jingsumar ei bad ki jaka ai counseling.
Ka Deputy Commissioner haba ai jingkren, ka la pynpaw ïa ka jingsngewkhia halor ka jingnang kiew jong kiba la kyrni ha u ne u jingdih bad ki jingeh ki ba imlang sahlang ka ïakynduh lyngba u drug. Ka la ong ba kane ka jingïakhih ban pynduh jait ïa kane ka jingmlien ba sniew, kam dei tang ïa ka ri ne ka jylla hynrei wat ha ki district ruh ka la dei ka por ban ïashim bynta lang ban ïakhun pyrshah, namar ka jingpur sted jong kane ka jingmlien ba sniew.
Ki ri ka pyrthei kynthup ka jylla jong ngi ki la mad ïa ka jingbun ki briew kiba kyrni ha u ne u jingdih ba sniew, u ba la pynsniew dur ym tang ïa u nongdih drug. Hynrei, u la ktah ruh ïa ki ba bun ki longïing bad ruh ïa ka imlang sahlang.
Ka la ong shuh shuh, kum ka district kaba dang thymmai bad kaba dang shim por ban kynjoh ha ka liang ki lad ïada, ka donkam ïa ka jingïatreilang na baroh ki liang, khnang ban lah ban ïakhun pyrshah ïa u ne u jait jingdih u ba sniew, u ba pynjot ïa ka imlang sahlang da kaba u trei ha kaba rieh.
Ka la ong ba ka lad ban pynkhlaiñ ha ka ban pynduh jait ïa u ne u jingdih, ka dei ka jingïasnohktilang naduh ki school, ki college, ki seng trei mon sngewbha, ki nongïalam Shnong ban pynshai paidbah bad ban peitngor ïa ka jingwan rung u ne u jingdih ha ki Shnong ki thaw. Da ka jingïatreilang, khlem artatien yn lah ban jop ïa ka thong bad ban lah ban pynlong ïa ka district, ka jylla bad ka ri kaba laitluid na u drug.
Shuh shuh, ka la kyntu ïa ki nongshongs hnong ban nym peit I beiñ ïa ki briew kiba la kyrni ha u drug. Hynrei, ban ai mynsiem ïa ki ba kin sangeh noh bad ban shim ïa ki lad ki lynti ki ban ïarap ïa ki ban sdang noh ïa ka jingim kaba thymmai.
