Sngew sangpap shisha ïa uba pli, u kyrtong jong ka seng VPP na Nongstoiñ, haba u ïoh ban long kyrtong, tang ha ki khyndiat taïew lane ba ka jinglong kyrtong, ka long tang ban shah sloit noh pynban bad kane ka jingjia, ka long hi thik, tang kum ka jingpynïateh ktien ïa u Bah Marbiang Nongsiej bad u paid nongjied ka Nongstoiñ Constituency, katba ynda la dei pat ka por ban ïathoh shong kurim sa bujli noh sha uwei pat.
Ka jingjia, ka la dei namar kata, ban pynpait dohnud dohnam ïa u Bah Marbiang, namarba ïa ka samla kaba ula ïateh ktien, la shu knieh noh jyndat da uwei pat bad ngim tip, la ula ïa ïaid la katno snem bad la ula pynkhreh pynkhrum haduh katno na bynta katei ka jingïa poikha ba don burom, ha ka 21 tarik Rymphang 2025, hynrei ngi tip shai, ba u la pynkhreh bha nadong shadong, ha la ka jong ka bor kaba rit jong u, ba un ïoh ban ïapoikha donburom bad ka Nongstoiñ Constituency ha ka sngi ba la buh.
Kin don kiba kren beiñ bad kiba nang thad rong ïa utei u rangbah hadien ba la don ba pyntip ba ka samla jong u ka la da dep rai ban ïalang bad ban ïathoh noh shawei bad kane ka la paw shai, ba la shah pynduh tiket, hynrei ka jingshisha, ka long ba lada kin jin da la mad dalade hi, hangta kin sa sngewthuh ba katei ka dei ka jingthadrong kaba la pohjait tam ïa utei u trai shnong jong ka Nongstoiñ bad kaba ktah ïa ka bok ïa ka rngiew bad kumjuh ïa ka longrynïeng hi jong utei uba la shu shah dkhat jubor khamakha ïa ka tiket jong u, namar ba utei u rangbah, ula don lypa ïa ka jingthmu ban ïaleh elekshon bad ula pyrkhat jylliew halade, ha shwa ba un pan tiket na katei ka seng saiñ pyrthei bad kumta ban shu pynduh noh tang hadien ba la pynbna, da ki khyndiat taïew, kumta kan dei ka jingleh ñiewbeiñ, kaba la palat liam bad kaba pyni ruh ba ka dei ka jingleh kyrkieh jong ki nongïalam jong katei ka seng saiñ pyrthei watla ïohi ba bun na ki nongkitkam kane ka seng kidei bun bha kiba la khraw pyrkhat ne kiba lah don ha ki kyrdan ba heh, bad kane ka jingjia kan pyntieng sa ïa kiwei pat ki kyrtong, ba kin trei hok, namarba kim tip, ïoh ba ma ki ruh, kin shah shet lang ha u dek, ha shwa jong ka sngi ba kin leit thep kyrteng, lane wat kin lah ban shah hukum ban weng ïa ki kyrteng jong ki, na ka tnat pynïaid elekshon.
Ka jingdkhat jubor ïa ka tiket jong u samla Marbiang, ka pyni ruh ïa ka jingbym larkam jong ka elekshon komiti, ba la thung ban jied ïa ki kyrtong, namarba kane kajuh ka komiti jong ka VPP, ka la pynïashrut hapdeng ki kyrtong MDC pyrshah ïa u Bah Adelbert Nongrum, MLA jong ka 17th North Shillong Constituency, nangta ka la jied ïa u briew uba nabar, ba un ïakhun na Jaiaw Mawprem bad nangta sa shibun kiwei pat ki Constituency, ha kaba wat kito kiba kyrshan ïa katei ka seng saiñ pyrthei, ki la kren ngiah bad sngew pyrshah jur.
Ki heh jong ka Election Committee lane ki high level jong ka VPP, ki dei ban sei ïa ki jingshisha bad ki daw kiba biang, ba balei ki la jied ïa u Bah Marbiang, ha kaba nyngkong bad nangta sa kaei pat ka daw, kaba ki lap pyrshah ïa u, ba ki hap ban shah pynduh tiket noh shiteng por; hynrei lada kim lah ban sei ïa ki jingshisha, kumta katei ka thew pynban, ba ka dei ka jingthmu ban pynjah burom ïa ka longrynïeng jong utei u rangbah, ïa ka ïing ka sem, ka shnong ka thaw jong u bad kaba ma ka long, ba kane ka jingleh kan pynbuid kti pynbuid kjat ïa ki heh jong elekshon komiti, ba kin tare sha kiwei pat ki kyrtong MDC, kiba rit bor bad kiba tlot jong katei ka parti, ha ki khyndiat sngi ban sa wan.
Ka por ka dang biang ba kan dei ban don ka jingïapynbeit halor kine ki kynrum kynram ha shwa ba kan poi sha kaba heh bad kaba pynthait bad pynngiah syndon ïa ki paidbah khamtam kito ki nongkyrshan ba ieid ïa ka party Voice of The People’s Party (VPP).
