Tang ban jop election sam ka NPP da ki tin sopïing sha ki longïing hapoh Gambegre, kynnoh u Dr. Mukul

Shillong, Nailar 24: U Myntri Rangbah barim ka jylla bad u nongïalam ka TMC ka Meghalaya u Dr. Mukul Sangma u la kynnoh ba ka NPP kaba la ïalam ïa ka sorkar ka la pyndonkam ïa ki skhim kum ka jingsam ïa ki tin sopïing sha ki longïing jong ka Gambegre Constituency na ka bynta ban jop ha kane ka election shiteng samoi napoh kane ka Constituency.
“Nga la buddien ïa baroh ki kam kiba la leh hapoh ka constituency. Kawei kaba la khring ïa ka jingmut jingpyrkhat jong nga la lap ba la bthah ïa baroh ki kam pynroi jong ka sorkar ba ki dei ban poi sha kane ka constituency kaba kynthup ïa ka jingleit dalade hi u Myntri Rangbah,” u la ong da kaba bynrap, “Kaba phylla, ngi ïohi shibun ïa kine ki jingleh, mynta ka donkam ïa ka jingpynshisha namar dangshen ki la don bun ki longïing, ki ïing ki sem kiba la ïoh ïa ki tin sopïing. La kine ki CGI sheet la sam na ka bynta kiba ïoh myntoi hapoh ki skhim jong ka sorkar lane la shu thied ïa ki ne la sam da ka party, ïa kane ngin hap ban wad,” ong u Dr. Mukul Sangma.
Da kaba ong ba kane kam dei kaei kaei hynrei ka jingkwah palat jong ka NPP ban ïoh ka jingjop na Gambegre, ong u Mukul da kaba bynrap, “Hynrei nga ong ïa phi ba ki paidbah kin sa ai ka jubab kaba biang.”
Haba kylli u la ong, “Ngin tan ïa ka muid na ki reng jong ka bad yn ym don mano mano ki ban lait na kane ka jingleh. Kane kam mut ba tang namarba ngim ju ïathuh khah khah halor kine ki kam beaiñ kiba la jia bad kane ruh kam mut ba ngi khlem trei eiei.”
“Nga la buh ïa baroh ki kam beaiñ ba la leh da ka NPP na ki jingmih kiba sniew nga lah ban ong ba ka la kylla long kaba la kham paw bad kane ka seng, ha kaba ka la long kaba sngewkhia ba kano kano bad kat shaba phai la pyntreikam ïa ki skhim ka la don beit ka jingïashah liang bad peit tang ïa kiba don ka jingïajan. Namar kata nga la sam ïa kine ki jingsngewkhia hapoh ka ïing ba ki ophisar kiba dei peit ki dei ruh ban shim ka jingkitkhlieh ban pyntreikam ïa ki skhim ba kidei ban long kiba peit bha naba ka aiñ ka don ïa la ka jong ka kti kaba jrong,” ong u Myntri Rangbah barim ka jylla.
“Ka la don ka jingpyrshang kaba ratbah da ka sorkar ban pyndkoh pynduh bor ïa baroh ki kam jong ka aiñ. Phi hap ban kylli ïa u Myntri Rangbah shaphang ka rukom treikam ka ophis Lokayukta. Hato ka ophis Lokayukta ka la treikam bha kumba la buh hapoh ka aiñ? Kine baroh ki long kiba kongsan. Lada kam pat treikam pura, kaei pat ka daw?” la kylli shuh shuh u nongïalam ka TMC.