Tang 7 bnai tam ba ngi ïohpor ban pynkhreh ngi lah ban ïoh 17% ka vote share: George B Lyngdoh

Shillong, Ïaiong 24: U Vice President ka All India Trinamool Congress (AITC) Meghalaya uba long ruh u MLA barim ka Umroi, u Bah George B Lyngdoh u la ong ba ka jingïoh vote ka AITC haduh 17% ka vote share kaba kynjoh haduh 2 lak shiteng tang ha ki 7, 8 bnai ba ka pynkhreh ïa ka elekshon ka pyni ba ka party ka don ka jingkyrmen ba kan lah ban leh bha ha kiwei pat ki elekshon ban wan.
Haba kren bad u Mawphor u Bah George u la ong ba wat hapdeng ka jingpyrshang kiwei pat ki party ban ïalam bakla ba ka AITC ka dei ka party bar jylla ne ka party Bengali hynrei ka jingïoh ïa kat katei ka vote ka pyni ba kiba bun ruh ki phai khmat sha ka party.
“Lehse ki kyrtong kiba ngi sei ki jop tang 5 ngut hynrei kane kam dei ka jingkut bad ka jingduh jingkyrmen ïa ngi namar lada ngi peit ha kane ka elekshon kaba la dep ngi kham tam ma ngi ïa ka jingïoh vote ban ïa ka Congress bad ïa ki party kiba don la da ki phew snem hangne,” ong u Bah George.
“Lada ngi peit na ka History jong ka saiñ hima ha ka jylla ym pat ju don kano kano ka party kaba lah ban synshar marwei ha kine ki 45 snem kiba la leit bad wat ka Congress kaba la don ha ka jylla la slem bah kam pat ju lah ban kynjoh ïa ka 31 seat kaba mut hi ba ki paidbah ka jylla ki bishar shuwa ïa ki kam kiba ngin leh, namar ka saiñ pyrthei ha ka jylla ka long kaba kham pher bad u paidbah jong ngi um dei uba shim rai kyrkieh” u la bynrap.
Haba kylli ïa ki daw kiba ka party kam lah ban jop kumba khmih lynti u Bah George u la ong ba ki hi ka dei namar ka jingjur palat ka jingpyntreikam ka pisa bad ka jingïalam bakla halor ka party.
“Phin peit ha kane ka elekshon ka jingjur ka jingtheh pisa ka long kaba palat liam bad ka jingïalam bakla ïa u paidbah halor ka partty ka jur bha hynrei wat la katta ngi lah ban jop haduh 5 ngut ki MLA bad ka vote shjar haduh 2 lak shiteng kane ka pyni ba ka jingkyrmen ka don ïa ka lawei ka party,” u la ong.