Tang 45 minit ha jaka 3 kynta na Nongstoin sha Maweit, pynbna u DyCM ba la mang 380 klur ïa ka surok Nongstoin – Ranikor

Shillong, Risaw 17 : U Symbud Myntri Rangbah ka Jylla, u Bah Sniawbhalang Dhar u la pynbna ba ka sorkar jylla ka la mang 380 klur tyngka na ka bynta ka surok Nongstoin-Ranikor da kaba ong ruh ba ka por ban ïaid da ka kali na Nongstoin sha Maweit ka la hiar na ka 3-4 kynta kaba ju long barabor sha ka 45 minit.
Da kaba pynpaw ba ka Nongstoin ka la kiew stet ha ka roi ka pa, u Symbud Myntri Rangbah haba kren ha ka prokram pynhap pyrda ïa ka MLA Cup 2026 ha Nongstoin, u la ong ba ka sor Nongstoin mynshwa kam shym la ïoh ïa ki kam pynroi hynrei mynta pat ka la kylla step ha kine ki lai bad saw snem ba la dep.
“Myshwa ha ki 3-4 snem ki skhim pynroi sor kim shym la poi sha Nongstoin, hynrei mynta ym duna shuh ki kam pynroi la ka long naduh ki lynti syngkieng, ki lynti hapoh ka sor bad kumjuh ruh ki lynti ïaid kjat ki paidbah,” u la ong.
Ha kajuh ka por u Symbud Myntri Rangbah u la ong dang ha ka sngi Palei ba la dep u Symbud Myntri Rangbah ba dei peit ïa ka tnad PWD Bah Prestone Tynsong u la wan ban buh ïa ki maw nongrim na ka bynta bun tylli ki projek ba kongsan, kynthup ïa ka surok Sohpian-Nongstoin kaba ki paidbah ki la ap khmih lynti la slem bha.
“Dang shen u Bah Prestone u la wan buh ïa ki maw nongrim na ka bynta bun tylli ki projek. Kawei na kine ka dei ka surok Sohpian-Nongstoin kaba phi baroh phi la ap khmih lynti. Nga kynmaw ïa ka surok Nongstoin-Maweit kaba baroh ki la angnud. Mynshwa ka shimpor 3-4 kynta ban leit, hynrei mynta tang 45 minit,” u la ong.
Haba kdew ïa kiwei pat ki jingmang pisa, u la ong, “Ngi la mang 380 klur bad ka jingtrei ka ïaid shakhmat khlem sangeh, naduh Nongstoin sha Ranikor, ha Balat, Mawsynram bad Welloi. Na Welloi ha Mawsynram, ka jingmang pisa ka long hapoh 200 klur, katba na Mawsynram sha Umpung haduh Ranikor ka long 274 klur.”
Haba ban jur ba ka roi ka par kam dei tang ha ki surok, u Symbud Myntri Rangbah u la bynrap, “Ka roi ka par kam dei tang ha ki surok, hynrei ka kynthup ruh ha ka liang ka koit ka khiah. Ngi sngewthuh ba lada ym don ka roi ka par, ym don ka ïoh ka kot. Dei na kata ka daw ba ngi pyrshang ban pynleit jingmut ha baroh ki liang, khamtam kumno ban wanrah ïa ka roi ka pa sha Nongstoin.”