Tang 40% ïoh bai jaka ki trai jaka ha Huroi kiba ai jaka ban shna ïa ka jingker sainar ha khappud: P Pohlong

Khliehriat, Klyngkot 21: Ki nongïalam ba ha khmat jong ka Khasi Students Union Seng Kmie lem bad ki nongïalam jong ka KSU East Jaiñtia Hills District, myn ha ka 19 tari mynta u bnai ki la leit hiar sha shnong Huroi kaba dei ka shnong ba khappud bad ka ri Bangladesh ha kaba la pynskhem ïa ki nongkitkam bad ki dkhot ba thymmai jong ka Khasi Students Union Huroi Unit.
Haba kren ha ka jingialang ba la pynlong ha shnong Huroi, u President ba rim jong ka KSU Huroi Unit, u bah Poly Pohlong u la pynpaw ka jingsngewkhia halor ka jingleh ki bor district jong ka East Jaiñtia Hills District myn ha kito ki por ba ki paidbah ki dawa ïa ka bai jaka namar ki la ai jaka ban shna ïa ka jingker sainar ha khappud, ha kaba ka seng ruh ka la ieng lang bad ki paidbah, u la ong ba ha kito ki por ka la don ka jingïakynad kaba jur bha hapdeng ki trai jaka bad ki bor district namar ba ki trai jaka ki la dawa bai jaka bad la ong ruh ba ba ki trai jaka kim pat ioh lut ïa ka bai jaka bad kat haduh mnta ki dang ïoh tang 40 Percent.
U Organising Secretary KSU Sengkmie, u bah Ostranic Marbaniang, u la shim ïa ka bynta ba kongsan, ha kaba u la pyntian smai bad pynskhem ïa ki nongkitkam bad ki dkhot ba thymmai jong ka KSU Huroi Unit bad hashwa kane, u la batai bniah ïa ka riti treikam jong ka seng ha kaba kum ki samla ki dei ban skhem ka nongrim ban long kum ki nongïalam khnang ba ki lah ban pyntyllun ïa ki kam jong ka seng ha kaba ïadei bad ka jingshakri ïa ka ri bad ka jaitbynriew, kumjuh ruh u la pynkynmaw ïa ki mat, ki nongrim jong ka KSU kaba ïeng skhem bad kaba ïai neh haduh mynta mynne bad kita ki long ki lai tylli ban ïada, ban pynneh pynsah bad ban kyntiew, u la bynrap ruh ba dei ban ïada ïa ka jaitbynriew na u nongwei nongar uba wan kam trai khlieh bad iuhroit ïa ka hok long trai jong ngi ki rit paid, kumjuh ruh ban pyneh pynsah ïa ka riti ka dustur bad ka jinglong ba kyrpang jong ka jaitbynriew khasi hangne ha sla pyrthei “Ka seng hi ka pyrshang ban kyntiew ïa ki samla jong ka jaitbynriew kiba don ha la ki jong ki sap ki phong ba ki don” u la bynrap.
U bah Ostranic u la pynkynmaw ruh ïa ki jingeh ba ka KSU ka ïa kynduh ha ka por ba ïakhih pyrshah ïa ka CAA ha kaba ka jaitbynriew ka la duh noh ïa uwei u dkhot ba shit rhem ha Ichamati ha u snem 2020 ha kaba kane kala pynsat ïa ki samla jong ka paid ka bri u Hynñiewtrep, ha u snem 2021 ki bor pulit ki la dkhat jubor ïa ka jingim u bah Cheristerfield Thangkiew, ha u snem 2022 ka jingjia sa ka jingshah dkhat jubor ki paradoh parasnam ha ki pulit Assam ha shnong Mukroh, u la ong ba kum ka jaitbynriew ngi mad ka jingshahleh beiñ ha ki mynder ri, ki bor sorkar bad na ki bor pulit Assam kaba na ka por sha ka por “Ngim tip shuh ha une u snem 2023 pat kan jia aiu ïa ka jaitbynriew jong ngi, ngi ngeit skhem ba ka jingdon ki samla ki ban ïakhih na ka por sha ka por, kiba ïeng na ka bynta ka dawbah bad ka hok jong ka jaitbynriew kan don ka jingkyrmen namar ba ka jaitbynriew kaba khih ka dei ka jaitbynriew kaba im”
La ioh ruh ia ka jingkren kyntu kynpham na u samla Shiningstar Kharbihkhiew uba la kyntu ïa ki nongkitkam jong ka KSU Huroi ban bud ryngtih ïa ka rukom trei kam ka seng katkum ki nongrim bad ki mat treikam kiba katkum ka riti treikam (Constitution) jong ka seng bad u la kyntu ruh ïa ki da kaba ong “haba long u dkhot ba pura jong ka seng phi dei ruh ban tip ïa ki nongrim treikam jong ka seng”.
La ïoh ka jingkren na u Rangbah Shnong ka Huroi, uba la ïa ki kyntien sneng bad kyntu kynpham ïa ki samla jong ka KSU bad ruh ban ai ka jingïatreilang bad ka Dorbar Shnong.
Kiba la ai jingkren ki kynthup ruh u Vice President KSU Delhi, u samla Wanlam Nongsiej, u Assistant Finance Secretary KSU- EJHDU, u samla Cherity Suja kumjuh ruh na u President ba thymmai jong ka KSU Huroi unit, u samla Wanlam Lamin Gadew bad kiwei kiwei.
Ki nongïalam jong ka KSU East Jaiñtia Hills District Unit kiba la ïa don ryngkat ki kynthup u General Secretary , u samla Kwillness Suchiang, u Organising Secretary, u Samla Deiniwan Lyngdoh, u Finance Secretary, u Samla Shaniahskhem Dkhar, u Assistant Finance bad kiwei kiwei ki nongïalam bad ki dkhot na ki District bad ki Circle bapher bapher, ïa ka jingïalang la pynïaid da u samla Kwillness Suchiang.
Ki nongkitkam ba thymmai jong ka KSU Huroi Unit, kiba la pynskhem ha katei ka sngi ki kynthup u President, u samla Wallam Lamin Gadew, Vice President, u samla Gilbert Khonglah, Secretary, u samla Poly Pohlong, Assistant Secretary, u samla Bashisha Suting, Organising secretary, u samla Listing Suting, Publicity secretary, u samla Vishal Sajem, Education secretary, u samla Mykhel Phawa, Assistant Education secretary, u samla Fullmoon Sumer, Finance secretary, u samla Tarling Lamin Gadew lem bad lai ngut ki dkhot executive ba kynthup u samla Ortika Khongkliam, Bu Suchen bad u Shak Lamin.