Tang 30,000 tyngka ka bai pule doktor ha Shillong Medical College na bynta ki samla pule ka jylla yn sdang mynta u Nailur

Shillong, Nailur 03 : Ki samla pule ka jylla kiba ïoh ban pule doktor ha Shillong Medical College kin hap ban siew tang 30,000 tyngka ka bai klas ha ka shisnem, pynbna ka Myntri ka tnad ka Koit ka Khiah, Dr. M Ampareen Lyngdoh ha kane ka sngi Balang.
Kane ka jingïathuh jong ka Myntri ka dei hadien ba ka National Medical Commission (NMC) ka la ai ka jingmynjur ïa ka Shillong Medical College ba kan sdang noh ïa ka jingpule doktor naduh mynta u snem na ka bynta ka snem 2025-26, hadien ba ki la ïoh pdïang ïa ka Letter of Permission (LOP) na ka NMC.
Ha kajuh ka por ka Myntri ka la pyntip ruh ba u Myntri Rangbah ka Jylla, Conrad K Sangma u don mynta ha nongbah Delhi ban khroh ïa u Myntri Rangbahduh ka Ri u Narendra Modi ban wan plie pyrda ïa kane ka Medical College ba nyngkong eh ha ka jylla Meghalaya.
“Ngi kyrmen skhem ba u Myntri Rangbahduh ka Ri un wan hi dalade ban plie ïa ka Medical College ba nyngkong eh ha ka jylla kaban pynïaid da ka sorkar,” ka la bynrap biang.
Ka Myntri ka la ïathuh ruh ba ka Shillong Medical College ka la pynkhreh mynta shaid shaid ban sdang noh ïa ka samoi ba nyngkong kaba ki khmih lynti ban sdang noh naduh mynta u Nailur.
“Kane kadei ka sngi kaba kmen tam na ka bynta ka tnad ka Koit ka Khiah ka Jylla bad ruh ïa ka sorkar Meghalaya baroh kawei namar ngi la ïoh pdiang ïa ka ‘Letter of Permission’ na ka NMC kaba la ai jingmynjur bad ka jingithuh ïa ka Shillong Medical College kum kawei na ki jaka pule doktor ha ka Ri naduh kane ka snem 2025-26 na ka bynta 50 ngut ki samla pule,” ka la ong haba kren bad ki lad pathai khubor.
Nangta, ka ïathuh ruh ba kumba leh lang ha ka ri baroh kawei hi, ka Jylla ruh mynta ka pynkhreh ban sdang noh ïa ka jingpule naduh ka taiew ba khatduh jong u Nailur.
La ïathuh ruh ba watla ka Jylla ka la don la ka jong ka jaka pule doktor hynrei kin dang ïai bteng pat ban ïoh ïa ka bhah pule doktor na kiwei pat ki medical college kiba don ha ka ri kaba long baroh 94 ngut.
“Da ka jingïoh mynta la ka jong ka Medical College kan ïarap ïa ka jylla ban lait na ka jingkyrduh doktor ha ki jaka sumar kiba don ha ka jylla,” la bynrap shuh u Myntri.
Ka Myntri ka la ong ruh ba na ka liang ka sorkar kim donkam shuh ban khuslai ban tei ïa ki jingtei thymmai namar ki la biang lypa ki jingtei kiba donkam baroh da ka jingdon ïa ka Shillong Civil Hospital kumjuh ka Ganesh Das Hospital.
Ha kajuh ka por ka Myntri ka la pynithuh ruh ïa ka Dr. Nicola Lyngdoh Ïangrai, ka doktor ENT kaba la paw bha na RIIMS kum ka Director jong ka Shillong Medical College.
Na ka liang ka Dr. Ïangrai haba kren bad ki lad pathai khubor ka la pynpaw ïa ka jingkmen ba ka ïoh ïa kane ka kabu ksiar ban wan trei ha la ka jong ka jylla. Da kaba kubur ba kin don beit ki jingeh ha kaba sdang hynrei ka la ong pat ba kin lah ban weng ïa ki da ka jingïatrei lang.
Ha kajuh ka por na ka liang u Commissioner & Secretary ka tnad ka Koit ka Khiah. Dr. Joram Beda u la ïathuh ba na ka 50 seat ka bhah pule doktor, 85persen kadei ka bhah ïa ki samla pule ka jylla kaban long baroh 42 ngut katba 15 persen pat kan dei ïa kiwei. U la ong ba kane ka 15persen kadei ka bhah kaba ju don ha baroh ki jaka pule doktor ha ka ri baroh kawei.