Tang 15 ngut ïoh ki trai jylla, 187 ki nurse shynrang na ri thor mano ban shim jingkit khlieh?

Shillong, Naiwieng 12 : Ka jingthungkam ïa ki nurse 233 ngut ha North East Indira Gandhi Regional Institue of Health and Medical Sciences (NEIGRIHMS) ka dang ïaid shaid shaid bad la sngewthuh ba ha kine ki khyndiat sngi ki ban wan, yn thung noh sa ïa ki 223-10 ( shiphew na ka bynta kiba don jingduna dkhot met). Hynrei kaba sngeduh mynsiem ka long ba, tang 15 ngut ki trai jylla ki ïoh ïa kane kakam, 187 ngut tang ki shynrang na ki jylla rithor kat kum ka result ba la pynmih da ka NORCET-5 ( Nursing Officer Recruitment Common Eligibility Test) kaba dei peit bad pynïaid tang ïa ki eksamin ban pynrung kam ha ki AIMS Delhi, bad ban pyndap ïa ki kam nurse ha baroh ki AIIMS ha ri India kumba 19 tylli.
Kane ka exam ka long kaba eh haduh katta katta bad lah ruh ban ong ba ka ïa ryngkat bad ki exam ban ïoh pule Doctor (NEET) , Engineer (JEET) etc kaba don ar bynta kaba nyngkong (Prelims) bad kaba ar (Main). Ki ST ki hap ban ioh 70% ban ïoh ïaleh ïa ka examin kaba ar hynrei ki jaid bynriew bun paid (UR) kiba dei ki ba sah dien ha ka jingdon jing em, ki donkam tang 50%. Kane ka exam ka don ruh ka jingkhate mark (Negative Marking) lada ka jubab ka long kaba bakla. Kumba 81000 ki nongïaleh ïa ka exam ba nyngkong, bad kumba 46000 ki pass bad la khot ban ïaleh ïa ka exam ba ar (Main) 20815. ïa ka advertisement la khot tang lai sngi naduh ka 25 tarik haduh 28 tarik August 2023 bad ha ka 29 tarik la pynjlan noh haduh 31.8.2023 kaba mut kheiñ lang baroh kan long tang 6 sngi. Hato kane ka Institute ka long ha kajuh ka kyrdan bad ki AIIMS ha ka ri ? Ka jubab ka long em namar kat kum ka jubab ba la ïoh da ka RTI, kane ka institute kam don jingtip ei ei ha kano ka kyrdan ka don.
“Lada kane ka jingleh ka long ban pynduh lad ïa ki briew jong ngi, ka la long shisha kaba da seisoh bha. Hato ngi hun ban shu ïa leh tamasa synrai, tamasa tlang katba ka pliang ja jong ngi pat lah rah u bar jylla? Bad kam kut tang hangta, ynda ki wan shane kiba ha ïing ha sem ruh kin wan lang bad kin ïoh ruh ban ïa thep vote kum ma ngi hi ha kaba ngin ïohi wat mynta ruh ki don ki constituency kiba ka result ka long kat shaba kine ki bar jylla ki jied” ong uwei u riew rangbah bym kwah ban pynpaw kyrteng ïalade. Katkum kawei ka kot khubor phareng ba la mih ha ka 1.9.23, ka seng jong ki nurse ba la soi kyrteng da iwei i bar jylla iba dang ïaleh ban oh kam hikai permanent ha ka college ki nurse ha NEIGRIHMS, ba kane ka jingleh kan long ban ïahap kyrdan bad kiwei pat ki AIIMS bad namar ka slem eh ban pyndep ïa ki exam ba mynshwa ba la pynïaid da kane hi ka office. Ka jingshisha ka long ba ïa ki nurse 231 ba dang shu dep thung ha une u snem 2023 la advertise naduh u snem 2018 bad ka shim por 5 snem ban pyndep namar kumba 2 snem ka dei ka khang shnong khlam Covid bad hooid ka don ruh ka jingduna namar kane ka office ka leh manual ïa kane ka jingthung kam kaba mynta pat la dep pynkylla online bad ka la kham stet.
Na kine ki 231, kumba 80 ngut ki trai jylla ki la ïoh kam wat la ka bhah reservation la leh da ka all India ha kaba ki ST ki ïoh tang 7.5% bad imat kane ka jingïoh bun ki trai jylla ka pynsngewsih ïa u khlieh duh kane ka hospital. Kumba 98% ki nongpang ha kane ka hospital ki dei ki nong India shatei lam mihngi bad katkum ki kyndon thungkam, kane ka institute ka lah eh ban pyntreikam da ka reservation jong ka ne ka thaiñ ha kaba ki ST kin ïoh 44% namar ngi don kyrhai ki nurse ban pyndap ïa kine ki post ba thylli.
U Myntri ka koit ka khiah jong ka sorkar pdeng u la ïaroh shi katdei eh ïa ka jingkhuid jingsuba jong kane ka hospital bad u kubur ba ka dei hi ka rukom ki briew jong ka jylla bad shuh shuh u la ong ruh ba ka nam jong ki nurse jong ka thaiñ shatei lam mihngi jong ka ri India ka lah poi shaduh shabar ka ri India khamtam ka ri Japan kaba da kwah da ki nurse na kine ki thaiñ. Hato mynta kane ka hospital kan wanrah shuh ki nurse na ki jylla kiba yn ïakren da kano kano ka ktien ruh ym ïa sngewthuh? Kine ki jaidbynriew ki dei ki bym nang ban kren Hindi ne English ruh. Te shano keiñ yn ïa poi kata ka jingai jingsumar ïa ki nongpang?
Katkum ki jingïateh, kino kino ki kam kiba ki trai jylla ki lah ban trei dei ban ai shwa ïa ki, hynrei hangne la ïohi ba kam long satia kumne. Tang ha ki 3 sngi ka advertisement, 2025 ngut ki nurse na Meghalaya ki la thep kyrteng bad tang 15 ngut ki shah jied. Mynta ka kynti la ïohi bun ki post la advertise mynta u bnai hynrei ki don kiba ki khasi mynta kim lah shuh ban aply namar kin nym don ki kyrdan ba la kwah wad la mynshwa ki bun ki trai jylla kiba trei ïa kane ka juh ka kam bad ïa kane ruh ki ong ba dei kum ki AIIMS. Ka jingshisha ka dei, kane ka Institute kum ka kyrteng hi ruh ka dei ka regional institute bad lada ki nongpynïaid ki bud ïa kane kan wan rah ka jingmyntoi ïa ka jylla kumjuh ruh ka dong shatei lam mihngi. Bunsien ka jia bad ki ïai jia kiba kum kine ki jingleh ka long ba ki trai jylla ki lah shu sngap bad u mynder da kaba u thied ne pynbiej ïa ki katto katne u leh katba mon. Dei ban kynmaw ba, wad la kane ka hospital ka dei kaba la pynïaid da ka sorkar pdeng hynrei ka don pat hapoh ka jylla Meghalaya bad u trai ïing u don ka hok ban kren ban tuklar lada ka jingmyntoi kam wan sha u.