Shillong, Naitung 13 : Hadien ba la plie ha ka 11 tarik u Naitung, 2024, ka Hello Meghalaya, OTT platform, ka la rakhe ïa ka lyngkhuh dap shisnem da kaba pynlong ïa ki prokram bapher bapher kiba ïadei bad ka kolshor, ki khana pateng bad ka jingkyntiew ïa ki sap ki phong kiba ka jylla Meghalaya ka don.
Tang ha kine ki shisnem, ka Hello Meghalaya ka la kylla long ka rynsan ka jingpynkylla na ka bynta ki local artist, ki nongshna phlim, bad kiwei kiba pyni ïa ki jingkynjoh jong ka ha ki jingïaid lynti ha une u mawmer ba shisnem bad kaba kyntiew ruh ha ka ïoh ka kot. Shuh shuh ka Hello Meghalaya ka long kum ka rynsan ban kyntiew ïa ki sap kum ha ka Filmmaking exchange program.
Naduh ba la seng ïa ka, ka Hello Meghalaya ka la lah ban lum kumba palat 3.8 lak tylli ki download bad lah jan 2 lak ki registration, da ka jingdon kiba peit kaba la kynjoh haduh 10 million bad ka por ba ki peit kaba long 4 kynta bad 30 minute katkum uwei uwei u nongpyndonkam. Ki phlim kiba pawkhmat ki dei kum ka Ka Chithi, Pynngop, Ka-Daw, 9-Lad, Jingim, bad Ahor, kiba la poi haduh 1 million ki view, kaba pyni ba kane ka rynsan ka la lah ban bat ïa ki nongsngap na ki nong Meghalaya.
Kane ka rynsan ka la mih kum ka jaka kaba aiti na ka bynta ban kyntiew ïa ki nongthaw phlim kiba na ka jylla, kaba tyrwa ïa ka rynsan kaba kyrpang na ka ban pyni ïa ki phlim, ki phlim ba lyngkot, ki music video, ki vlog, ki documentary, bad ka jingpyni ruh ïa ki phlim ha ki ktien shnong kum ha ka ktien Khasi, Garo, bad Pnar.
Lah ban kdew ba tang ha kane ka shisnem, ka Hello Meghalaya platform ka la kylla long ka dak jong ka jingkyrmen kaba plie lad na ka bynta ki samla, kaba ailad ruh ïa ki ban ïoh ka jaka ha ki rynsan jong ka pyrthei ban pynpaw ïa la ki jong ki sap bapher bapher.
