Takraiñ ka AITC ïa ka Sorkar Pdeng bym sngewthuh ïa ka jingdonkam jingsuk ha North East

Shillong, Naiwieng, 23: U Nongïalam ka Liang Pyrshah ka All India Trinamool Congress (AITC) u Mukul Sangma ha ka Sngi Balang u la takraiñ tyngeh ïa ka Sorkar Pdeng halor ka jingbym sngewthuh ïa ka jingdonkam jong ki jylla ka thaiñ Shatei Lammihngi ha kaba ïadei bad ka jingpynneh ïa ka shongsuk shongsaiñ ha kane ka thaiñ.
Ha ka jingïakren bad ki lad pathai khubor u Sangma u la ïathuh ba ka Jylla Meghalaya bad kiwei kiwei ki Jylla ka thaiñ Shatei Lammihngi ki ladep phah ïa ka jingrtyrwa sha ka Ministry of Home Affairs (MHA) ha kaba ïadei bad ka jingdawa ban pynkha ïa ki Police Station ha shilynter ka khappud hynrei kane ka jingdawa ka shu sahkut ha ka almari jong ka MHA.
Kane ka jingkynthoh jong u ka long hadien ka jingshah siat ïap jong ki hynriew ngut ki briew ha ki Pulit ka Jylla Assam ha ka shnong Mukroh, West Jaiñtia Hills ha ka step Sngi Baar.
Haba pynpaw ïa ka jingdonkam ban pynkhlaiñ ïa ki bor pahara ha kane ka thaiñ u Sangma u la ong, la bynshet ïa kane ka jingkitkhlieh ha ki sorkar jylla bad ha kajuh ka por bun na ki jylla ki don hapdeng ka jinghiran pisa.
“Nga sngewkmen ba ka Sorkar Pdeng ka la sngap ïa ka jingpynsngew mynba u P. Chidambaram u dang long u Myntri ka tnat Kam Pohing ka Ri bad ngi la ïakren sani shaphang kane ka jingkitkhlieh ym tang ha ka jylla Meghalaya hynrei wat kiwei kiwei ruh ki jylla bad ngi la aiti ruh ïa ka jingtyrwa ïa kaba la kular ban bei pisa da ka Ministry of Home Affairs na ka bynta ban tei ïa ki Police Station ha khappud. Ngi sngewkmen. Ha ka jingshisha, katkum ka shithi, ka la don ka jingmang pisa ba la ai sha ka Arunachal Pradesh bad ngi ruh ngi la khmihlynti ban ïoh pisa na ka bynta kane ka jingtyrwa. Kynsan, hadien ka elekshon ha u snem 2014, baroh ki kam ki la pulom. Dei na kata ka daw ba nga ju ong ba ki sohkyrdot kiba ïadei bad ka synshar ka khadar ha kaba ïadei bad ki jylla bapher bapher jong ka thaiñ Shatei Lammihngi, ki briew na Delhi ki dei ban sngewthuh shai,” u la ong.
U la bynrap ba ka Sorkar Arunachal kaba la ïoh ïa ka shishi mang pisa hynrei ka pisa kam shym la poi satia. Kumjuh ruh ka Meghalaya kam shym la ïoh pisa eiei ruh em.
“Nga la pyrshang ban pynsngew ha ka Sorkar India, nga kwah ban ïakren biang bad ki ha ka por ba u Rajnath Singh u dang long u Myntri ka tnat Kam Pohing bad watla ma u shimet u sngewthuh ïa kane hynrei ka Ministry of Finance kam shym mon satia ban bei pisa,” la bynrap u Sangma bad ong, “haba phim don ïa ki briew kiba lah ban ai jingïaroh ha ki jingshah tynjuh kiba bun bad dei mynta ka la wan jia da kumne.”
Shuh shuh, une u nongïalam ka Liang Pyrshah u la ong ba bun na ka pisa ba la mang da ka Sorkar India sha ki Jylla ka thaiñ Shatei Lammihngi la weng noh. Kine ki kynthup ïa ka Special Plan Assistance ba la mang sha ki Jylla ka thaiñ Shatei Lammihngi.
“Kine ki dei ki daw kiba dei ban pynsngew sha ka Sorkar India ba kin dup sngewthuh ïa kiba bun ki jingeh ba ki sorkar jylla ki la mad bad kane kam shym la urlong satia. Ka paw pynban kumba pynsngew ha ki tyndong skhor ba kyllut,” u la ong bad bynrap, dei na kane ka daw ba ki jylla ka thaiñ Shatei Lammihngi ki ju sakhi kum ka jingjia ha ka shnong Mukroh.