Jowai, Ïaïong 23 : U Bah Sniawbhalang Dhar uba dei u symbud Myntri Rangbah ka sorkar jylla ha kane ka sngi saitjaiñ ha ka jingwan pynhap pyrda jong u ïa ka jingrakhe dap 50 snem ne ka Golden Jubilee Celebration jong ka West Jaiñtia District Sports Association (WJDSA), ula ong ba na liang jong u yn pynïoh haduh 25 klur tyngkat na ka bynta ban pynbha pynmiat ïa ka Kiang Nangbha Stadium Jowai.
Na ka liang u Bah Sniawbhalang Dhar ula ong ruh ba un ai shiphew lak tyngka na ka bynta ban pynlong ïa ka lympung ‘Open to all Football’ ka ban tip ha ka kyrteng u kpa jong u, u (L) K. Pala uba dang shu khlad shen. Na ka liang u Bah Sniawbhalang ula ong ruh mynta ki sngi ka jingïalehkai Sports khamtam ka phutbol kam dei shuh tang ban kilan met ne ban rah nam ïala ka jong ka kynthun hynrei ka dei kam kamai kajih na ka bynta ki khun samla.
Shuh shuh u Bah Sniawbhalang ula ai ruh ka jingïaroh ïa ki nongkit kam Association kiba naduh mynshwa haduh mynta ka jingïaid lynti ka jong ki kaba la dap 50 snem, da kaba u la ong ruh kam dei ka kam kaba suk ban shakri ïa kane ka kam khlem kano kano ka jingsiew, hynrei dei ka jingtrei shitom jong kine ki nongkit kam naduh mynshwa haduh mynta la lah ban pynïaid ïa sibun ki kam jong ka Association ha ka jingïadei bad ki kam ïalehkai Sports bapher bapher.
Ha kane ka jing ka jingrakhe 50 snem ka WJDSA la wan ban ïadonlang ruh u myntri ka tnat Sports u Bah Shakliar Warjri, MLA ka Jowai Bah Wailadmiki Shylla, ki nongkitkam ka WJDSA, ki khynnah skul bad kiwei kiba la shah khot sngewbha.
Na ka liang ka Association kum ka dak ban leh burom ïa ki dkhot Association, ki Referee bad nongïalehkai sports bapher bapher kane ka District kiba la shim bynta kylleng kylleng, la don ka jingpynkup burom sah kynmaw ïa ki da kaba ai da ki Memento bad ha ka juh ka por ka Association ka sam ruh ïa ki memento sha ki longïing jong dkhot jong ka kiba la khlad noh naduh ba la sdang ïa kane ka Association.
La pynphuh pynphieng shuh shuh ïa kane ka sngi khadduh jong ka jingrakhe da ki jingshad jingrwai bad leh Drill, kaba la shim bynta da ki khynnah skul bad ki dong jong ka sor Jowai. Kum ban pynkynmaw shi bynta na ka jingrakhe ïa kane ka Jubilee Ksiar ka WJDSA kala dep ban pynlong shibun ki prokram ïalehkai bapher bapher.
