Shillong, Risaw 03 : U MLA ka Mawlai Konstitwensi u Bah Process T Sawkmie hynne ka sngi u la noh synñiang 2 lakh tyngka sha ka Mawlai Sports Club ha ophis treikam jong u ha Mawlai Nongpdeng.
U la aiti ïa ka song pisa ha u President ka Mawlai SC u Bah Marcel Kharbani, ha ka jingdon ryngkat u General Secretary Bah Mawkordor M. Nongsiej, ki nongkitkam ka MSC, u Bah Homer Kharkongngor, President ka UDP Mawlai Circle, Bah Wanseng Jyrwa bad kiwei kiwei.
Haba ïadei bad kane ka jingai u Bah PT Sawkmie u la pynpaw ba u la noh synñiang ïa ka MSC kum shi bynta jong ka jingdon bynta lang halor ka jingwanrah burom ka Sport Club kaba la ïohrah ïa ka nam lahduh ha ka SPL ba mynta ka samoi bad u pynpaw ruh ba un ïai don rymgkat bad ka MSC ha ki sngi kiban sa wan ruh.
U pynpaw ruh ba u dap da ka jingkmen ba ha ka por ba u long kum u Myntri ba khmih ïa ki kam sports ha ki snem kiba la leit u la lah ban pynshna ïa ka stadium, ym tang katta, hynrei u la lah ruh ban pynïoh ïa ki Indoor Sports Hall kiba bun hapoh Mawlai. Kum u nongmihkhmat u la pynpaw ba u la shimkhia ruh ban pynurlong ïa ka madan ha Mawtawar kum kawei ka National stadium hapoh ka thaiñ.
“Nga sngewsarong ba ka Mawlai SC ka la ïohrah ïa ka nam lahduh ha kane ka samoi kaba mynta bad nga ai khublei kyrpang ïa ki nongïalam ka Mawlai SC bad ïa baroh ki rangïaialehkai kynthei bad shynrang kiba la wanrah nam bad burom ïa ka shnong Mawlai,” ong u Bah PT Sawkmie.
Ha ka juh ka por u ai khublei ruh ïaia u Bah P. M Lamare, uba kyrshan ïa ka Mawlai SC bad u kyntu ïa u ba un dang ïai bteng kyrshan ïa ka klob ha ki sngi ki snam kiban wan ruh.
