Nongpoh, Lber 19: Ki paidbah jong ki shnong bapher bapher ha ka thaiñ Raid Madan Kyrdem ba hap hapoh ka Ri Bhoi District ki la hap ban mad ïa ka jingsyrtok ha ka leit ka wan, kaba dei na ka daw ka jingshna ïa ka surok thymmai na Bhoirymbong sha Khyndewso bad na Nongthymmai sha Mawbseiñ.
Kiba bun ki paidbah la bun bun snem mynta ki la syrtok ha ka leit ka wan na ka daw ka jingsniew jong ka surok kaba la shah iehnoh bein la bun bun snem, hynrei mynta ka sorkar ka la mang tyngka ban siang rong thymmai ïa katei ka surok khnang ban suk ban sain ki paidbah ha ka leit ka wan, hynrei na ka daw ka jingpyntrei torti u Contractor ha ka jingthmu ban siang rong ïa kane ka surok ka la pynjynjar pynban arshah ïa ki paidbah ha ka leit ka wan.
Kumba la lap bad sakhi, u Contractor ba pyntrei ïa kane ka surok ula shuh tieh ïa ki maw ha shi lynter ka surok da ka jingthmu ban siang rong, hynrei namar ba la tieh ïa ka surok ka la pynjynjar arshah ïa ki paidbah ha ka leit ka wan ba la jynjar ban leit ki Kali ki motor.
Kumba la pynpaw da ki paidbah, hooid ki kmen ba ka sorkar ka la phai khmat kyrpang na ka bynta ban siang rong ne pynbha ïa katei ka surok, hynrei ka rukom leh jong u Contractor pat ka la pynjynjar pynban arshap ïa ki paidbah ha ka leit ka wan na ka daw ba la shu tieh ïa ka surok bad la shu tap da ki maw ba ka long kaba jynjar bha ban leit wan ki kali paidbah.
Kaba kham pynjynjar shuh shuh ïa ki paidbah, ka dei ka jingpum pum ha shi lynter ka surok khamtam ha kane ka por tyrkhong tang shu ïaid kali ki paidbah ki la hap ban ring mynsiem da u pum pum, kaba ktah kylla pynban ïa ka koit ka khiah ki paidbah namar lyngba jong kane ka surok la pyndonkam naduh ki khynnah skul, kiba pang ba shitom bad ki paidbah hi jong ka thaiñ Raid Madan Kyrdem.
Kiba bun kiba lang ki la kyrpad ruh ïa ka sorkar ba ka shim khia ban kren ïa u Contractor ba un pynsted ïa ka kam na ka bynta ban siang rong ïa katei ka surok bad ym tang da kaba shu tieh ïa ka surok ha baroh shi lynter jong ka surok kaba la pynjynjar pynban ïa ki paidbah bad da thmu ban siang rong ruh dei ban pyndep shwa khyndait khyndiat khnang ba kan nym ktah ïa ki paidbah ha ka leit ka wan, pynpaw ki riew paidbah.
