Nongpoh, Naitung 19: Wat la ïa ka bording ilektrik la tan na Ri Bhoi ban pynbiang ïa ki jingdonkam jong ki paidbah ha ka jylla, hynrei ki paidbah ka Ri Bho District ki dang hap ban mad ïa ka jingsyrtok ha Ri Bhoi, na ka daw ka jingthud palat ka bording ilektrik.
Ïa kane la sakhi ruh ba ka jinglip bording ilektrik ka la ktah bha bad khamtam wat ka District Head quarter jong ka Ri Bhoi, kaba dei ka Nongpoh kam ju ioh satia ïa kata ka bording kaba thikna.
Tang shu slap jur, la thikna ba ki paidbah ka thain Ri Bhoi, ki la duh bording bad bun ki kam ki ki jam ki la sahkut lut bad kane la sakhi ruh ba ha Nongpoh mynta la jan ar sngi, ka bording ilektrik kam biang thikna, ka bun kaba duh bor jingshai bad ïa kaba ki paidbah ki ioh ban pyndonka.
Kumba long mynta, kiba bun ki riew paidbah ki ud ki nam ïa kane ka jingshah ktah na ka jinglip ba khah khah ka bording iletrik bad bun ki paidbah ruh ki la sngewngiah ha kaba wat ban siew ïa ka bai bording iletrik, bad ka daw ka long ba kim ioh satia ïa ka bording ba thikna kumba la angnud da ki paidbah.
