Syrtok ki paidbah ba ïaid na surok Ïew Mawlong, liat ki briew ha ka thliew nala ba dap umktieh

By Mawphor Editor On Apr 23, 2025

Shillong, Ïaïong 22: Kumba arngut ki briew ha kine ki sngi ki la liat ha kawei ka thliew kaba dei ka nala kaba la dap da ka um jaboh kaba kyrsoi sha surok kaba don ha Ïew Mawlong Shillong bad kane ka jingliat ne hab jong kitei ki arngut ki briew kadei namarba kim poi pyrkhat ha ka don ka thliew nala kaba heh bha naba ka la dap da ka um kaba ktieh.
Ïa kane la ïathuh da katto katne kiba ñiah kali kamai ha katei ka thaiñ haba kren bad u nongthoh khubor. Kane ka thliew nala ka dei kaba dap da ka um jaboh kaba wan na Ïewduh bad na kiwei pat ki nala kiba wan ïasohlang ha kane ka jaka.
Kiba shong dukan kiba don ha kane ka jaka haba kren bad u nongthoh khubor ki la ïathuh ba ha kawei ka sien ba la khlong ïa kane ka nala la lap ba ka dap tang da ki bilor plastic, ki jaiñ, ki jaboh jabaiñ bad kiwei ki jaboh ba la pyntuid pathar sha kane ka nala kaba la long ruh ka daw jong ka jingsahkut ka jaboh bad ba ka um kam ïoh shuh ban tuid sha kawei pat ka nala kaba don sha shilliang ka surok ha Ïew Mawlong.
U Bah James Khongwir uba sah ha Upper Shillong uba la wan ruh ban khmih ia kane ka nala ban peit ha kano ka rukom ba yn lah shna u la ong ba tang kawei ka lad ba lah ban pynbha bad ban ailad da kaba suk mynsiem ïa ka um ban tuid sha ka nala kaba don sha shilliang ka surok ka long ban shu tih beit napdeng surok bad ban shna da ka nala kaba long ban tap najrong khnang ba kan ym ktah ïa ka surok ban ïaid ki kali.
La ïohi ba ki paidbah kiba ju ïaid manla ka Sngi na surok Ïew Mawlong ban leit la ki jong ki jingleit ki la hap ban mad ïa ka jingeh kaba manla ka Sngi na ka daw jong ka jinghap ïaid lyngba ka um ktieh kaba mih na kane ka nala ha kaba ka um jaboh kaba wan na ki jaka bapher ka kyrsoi na kane ka nala bad tuid pat sha ka surok ba ïaid ki paidbah.
Wat la kam don ka jinghab slap hynrei kane ka nala ka shu shlei um beit 24 kynta.
Haba ïakren shuh shuh bad u Mawphor kine kiba shong dukan bad utei u rangbah ba sah ha Laimer upper Shillong la ïathuh ba kane ka nala ka la wanrah jingeh shibun ïa ki paidbah bad kumjuh ruh ïa kiba shong dukan nangta bad kumjuh ruh ïa kiba ñiah kali kamai kiba hap ban mad ka jingsma iwtung kaba mih na kane ka nala.
Ki la ïathuh ruh ba kane ka nala ka dang hab hapoh ka jingpeit jong u Syiem ka Hima Mylliem kumta ki la kyrpad ïa ka Hima ban shim khia noh mardor ban peit ïa kane ka jingeh ba mad da ki paidbah.