Baroh, tang shu poi ka por 8baje mynstep khamtam naduh sngi Nyngkong haduh sngi Thohdieng ki nongñiah kali ki la thnam jabieng lut namar ka jingjur palat ka dheng kali. Ka daw baroh kadei namar ka por ba baroh ki kali ki beh ban poi sha ki skul bapher bapher kiba don ha ka nongbah. Ym lah ban len ba ki don kiba wan man ka sngi na ki jaka kiba don haduh 20 ne 30 kilometer ruh ban wan skul sha Shillong man ka sngi.
Ka daw tynrai hi, katkum ka jingwad bniah da ka ophis jong ka Deputy Commissïoner ka East Khasi Hills ka kdew ka long ba kumba 20 persen na ki kmie ki kpa kiba don ha Shillong ki ju leit buh ïa ki khun ha lynti ba ki leit trei artad. Nalorkata, katei ka sorbe ka lap ruh ba ki don haduh 68 persen na ki kmie ki kpa jong ki khynnah skul ki pyndonkam da ka jong ka kali ban leit shaw ne leit buh ïa ki khun man ka sngi.
Kumta, lada peit katkum katei ka sorbe kaba ki bor distrik ki leh ha ki 19 tylli ki skul bad na ki 6510 ngut ki kmie ki kpa ki pynpaw ba ka jingbun ki kali ha ka por long skul kadei ka dawbah kaba wanrah ïa ka dheng kali.
Lada shu kheiñ antad malu mala, ym duna shuh ïa ki 10 tylli ki skul kiba don tang ha nongbah Shillong bad ka Laitumkhrah kadei ka pdeng bah jong ki jaka pule kiba bun tam ki samla pule. Kumta lada kawei kawei ka skul ka don tang kumba 1000 ngut, kata naduh KG haduh ki klas kiba heh khlempep tang ha katei ka thaiñ ki la jan poi phew hajar ngut ki khynnah skul kiba ïaid man ka sngi lyngba katei ka surok.
La ïoh ruh ha kane ka juk mynta, kawei ka kali lada bun eh ruh arngut ki khynnah kin shong kumta lada ki khynnah baroh kiba leit skul sha katei ka thain ki don 5000 ngut la kumno kumno 2000 haduh 2500 tylli ki kali kin ïaid tang ha ito i por 8:00 haduh 9:00 baje mynstep. Ym tang katta, kitei ki kali ki hap ruh ban mad sa ïa ka dheng kali kaba jur ban ïoh mih na ki jaka ba ki wan buh skul, ka daw ka long ba ha ka jingïabeh por ki kali ki la rung kat naba lait bad kane ka wanrah pat ïa ka dheng kali kaba jur.
Kumta, lada na ka ophis jong ka DC East Khasi Hills ka la ïoh ban bishar ïa katei ka kaiphod ka la dep ban pyntreikam noh da kino kino ki lynti lane da ki school bus ban tehlakam ïa ka dheng kali. Lada shu ai nuksa, kawei kawei ka school bus kan ngiam beit 50 haduh 60 ngut ki khynnah skul bad kumta kawei ka bos ka la ïaryngkat bad 20 ne 30 tylli ki kali rit, kumta khlem artatien kan ïarap bha ïa ka jingkhapngiah. Ka por ka dang biang ïa ki bor sorkar ban pyntreikam ne pyrshang shipor arpor da ki bos khnang ban ïohi la kan ïarap ne kan nang pynjur shuh shuh ïa ka jingdheng kali la ka long ha ka por leit buh skul ne ka por leit shaw skul.
