Synshar ka Shillong College ïa ki kyrdan ba nyngkong ha ka 12th Inter-College Karate Tournament 2025

SHILLONG, Nailur 14: Ka All Meghalaya Karate-Do Association [AMKA] ha ka jingïatreilang bad ka Sports Development Cell, Shillong College, ka la ïoh ban pynhap pyrda noh ïa ka 12th Inter College Karate Tournament 2025 ha ka sngi Saitjaiñ (13 tarik Nailur, 2025).
ïa kane ka lympung la pynlong da ka jingkyrshan jong ka tnad Sports jong ka Sorkar Jylla. La pyndonkam ruh ïa kane ka lympung kum shi bynta jong ka Talent Scouting Programme (ka prokram wad sap sap) jong ka AMKA na ka bynta ka 39th National Games 2027, kaba ka jylla Meghalaya kan pdiang.
Ki don 7 tylli ki College kiba ïasoh lang ban shim bynta ha kane ka lympung, ha kaba 30 ngut ki nongïalehkai (12 ngut shynrang & 18 ngut kynthei) ki la ïakhun ha ki jingïajop ba kynthup ïa ka Open Kata bad ka Open Kumite.
Ha kane ka kynti ki nongïalehkai karate jong ka Shillong College ki la long kiba seisoh tam da kaba jop lut ïa ki kyrdan nyngkong ha baroh ki jingïakop jong ki kynthei bad shynrang.
Ki lahduh ha baroh saw tylli ki kyrdan ki long: u Gideon Tympuin (men’s open kata), u Cheltis Shylla (men’s open kumite); nangta ka Rebeka Nongspung (women’s open kata & women’s open kumite). Baroh kidei na ka Shillong College.
Ka St Anthony’s College ka la khur kawei ka takma rupa bad saw tylli ki takma rnong ha ka jingïakop jong ki shynrang, katba ka St Mary’s College bad ka Lady Keane College ki la jop kawei ka takma rupa bad kawei ka rnong ha ka jingïakop jong ki kynthei. Kumba ju long ha ka jingïalehkai martial art, ki arngut kiba shah rem ha ka semifinal kin ïoh kyrdan ba lai.
La wan kongsan ha kane ka sngi da u Dr. S Khongwir-Principal jong ka Shillong College, ryngkat u Bah Finely L Pariat-General Secretary jong ka MSOA). Kiba la donlang ha kane ka sngi ki kynthup ruh ïa u Bah Ksan Kupar Warjri-Secretary jong ka AMKA, nangta u Bah Cleverson Syiemlieh-Convenor jong ka Sports Development, Shillong College, nalor kiwei kiwei.