Nongstoiñ, Nailur 17: U District Magistrate West Khasi Hills District Bah Garod L.S.N. u Dykes IAS, u la pynmih ïa ka hukum katkum ka Section 163 jong ka aiñ BNSS Act 2023, ban khang ïa ka jingpynïaid ïa ki kali kiba kit palat ïa ka 9 metric ton ha ka jingkieng No. 6/1, ka jingkieng No. 16/1, bad ka jingkieng No.17 /1 jong ka surok Nongkasen-Nongkhlaw.
Ki jingkieng kiba la kdew haneng, ki don ha ka jinglong kaba la tlot bad ka jingbteng ban pyndonkam da ki trok kiba kit palat pud, ka buh jingma kaba khraw ïa ka jingshngaiñ ka leit ka wan ki paidbah bad ka lah ruh ban wanrah ïa ki jingjia bym poi pyrkhat. Kumta, ban ïada na ka jingpynjot shuh shuh bad ban pynthikna ïa ka jingshngaiñ jong ki paidbah, kane ka hukum kan treikam noh mardor.
Kiba pynkheiñ ïa kane ka hukum kin ngat ha ki kyndon aiñ 153 jong ka BNSS Act 2023. Ïa kane ka rai la shim kyrkieh ban weng ïa ka jingma kaba lah ban mih mardor bad ban wanrah jingshngaiñ ïa ka leit ka wan ki paidbah. Ki bor pynïaid District ki sngewnguh ïa ka jingïatreilang jong ki paidbah ban bud ryntih ïa kane ka jingbthah.
