Nongstoiñ, Rymphang 25: Kiba bun ki nongshong shnong ha ki nongkyndong haduh kine ki sngi ki kyshan ïa ki ïing ki sem da kaba rep ba riang, ri jingri kum ki syiar, ki sñiang, ki blang, ki masi bad kiwei. Na ki kam ri jingri, ki syiar Khasi ki dei ki jingri kiba kawei pa kawei ka longïing ha ki nongkyndong ka don beit bad ki dei ruh ki jingri kiba suk tam bad ki bym da donkam eh ban sharai kum ïa ki masi, ki blang.
Ha kine ki sngi pat ka jingri syiar Khasi ha ki nongkyndong kam long shuh kaba shngaiñ, namar ka jingkynrei ka jingpang khlam kaba la sar naphang ïa ki syiar ha kaba da ki hajar ki syiar ha ki shnong bap her bap her ki la ïap lut khoit.
Ka kong P.Syiem na ka shnong Mawïawet, ka la ong ba ha ka shi snem ka ju kamai palat phew hajar tang na kaba die syiar bad mynta u snem ka jingwan lynshop ka khlam kaba la sdang ha ka taïew ba nyngkong jong une u bnai Rymphang, ka la sar lut plaiñ ha kaba palat shispah tylli ki syiar bad ba lah heh bad kiba dang rit ki la ïap lut khoit.
Katei ka long kmie ka la ong ruh ba katei ka khlam ka la sdang nyngkong na ki ïing kiba marjan bad haba ka la ithuh ba ki syiar ki la sdang kem shitom, ka la pyrshang ban ai dawai hynrei kam ïarap satia bad haduh kine ki sngi ym don shuh wat tang iwei ruh.
Ka la ong ruh ba ki don hynriew tylli ki ïing jong ki paramarjan kiba ri da ki spah tylli ki syiar. Hynrei ka jingwan jong ka khlam ka la bam duh hi plaiñ ïa ki syiar jong baroh hynriew tylli ki longïing. Haba phai ha ka jingpang khlam jong ki syiar la ju lap ba shisien ba la kem pang uwei u syiar napoh ka sem, ym ju kham don koit kiba dang lait na ka jingïap wat lada ki don da ki hajar ruh.
Ha kaba ïadei bad katei ka jingpang khlam jong ki syiar Khasi haduh mynta ym pat lap ïa ka tynrai na kaei ka daw ba ki syiar Khasi ki ïoh jingpang khlam. Wat na ka liang ki tnad treikam jong ka sorkar kaba dei peit ïa ka kam ri jingri, kam pat lah ban pynshai da kano ka lad lah ban ïada ïa ka jingpang khlam jong ki syiar Khasi.
Kumba ka long hi ka tnad ba dei peit ïa ka kam ri jingri ka tip bad shimkhia tang ïa kito ki nongri syiar khlem kpa (broiler) bad (curoiler), namar ki nongri ïa kito ki jait syiar ki hap ban leit thied symbai na ki Agent kiba la ïadon bynta bad pynïadei bad ki Farm jong ka sorkar, hynrei ïa ki nongri syiar Khasi (Local chicken) pat haduh mynta ka sorkar kam pat ithuh ba ki dei ki nongri jingri.
Nalor kata kam don jingïapher ei ei ruh ba ïa ki nongri masi khuti kiba ri da ki spah tylli ki masi, ka tnad sorkar ba peit ïa ka kam ri jingri kam ithuh satia.
Hynrei ïa ki nongri masi khem dud kiba ki na ka skhim Sorkar wat lada ri tang uwei ruh, ka Sorkar ka la ithuh kum u nongri masi. Lada kan long kumne ïa kito ki nongri syiar curoiler ne broiler hapoh shnong, ym dei shuh ban dang ailad hynrei ki dei ban wad da ki jaka kiba jngai bah na ki shnong ki thaw.
