Syllad ka ‘erïong, julor 23 tylli ki ïing briew, kawei ka ïing skul, kyllon ki post elektrik

Mawkyrwat, Ïaïong 27: Ka jingwan u slap ryngkat ka ‘erïong ha ka miet sngi Saitjaiñ bun tylli ki longïing ki la shah ktah ha ka thaiñ Ranikor Civil Sub Division, South West Khasi Hills District.
Ka tyllong khubor ba la ïohlum la ïathuh ba ki longïing kiba la shah ktah ki kynthup ha Nongkdait 10 tylli ki ïing, ha Puksora 10 tylli ki ïing, ha Ranikor 3 tylli ki ïing, kawei ka ïing skul bad ka jingkyllong ki post elektrik kaba la jia ha shnong Dirang.
Ha kane ka jingjia ka la don ruh ka jinghap khyndew ha surok ka shnong Alukureng bad ka jingpynkhuid ïa ka khyndew bad ïa ki maw ka dang iaid shakhmat.
La ïathuh ruh ba ha kane ka jingjia ym shym la don mano mano ba mynsaw bad na ka bynta ki ïing sah shipor la dep ban pynkhreh da ki shnong.