SWKHDL Subroto Cup 2026. : Lahduh ka Rangthong, ka Maharam Govt., bad ka Balang Mawlangwir HSS

Mawkyrwat, Naitung 02: Ka jingïalehkai kynjatbol kaba la tip kum ka South West Khasi Hills District Level Subroto Cup Football Tournament 2026 mynta ka sngi ka 2 tarik u ‘Naitung, 2026 ka poi noh sha kaba kut ha kaba ka Rangthong Christian Higher Secondary School, ka Maharam Government Higher Secondary School, Mawkyrwat bad ka Balang Mawlangwir Higher Secondary School, Mawlangwir ki la long ki lahduh ha kane ka lympung ïalehkai ba la pynïaid da ka ophis jong ka District Sports Officer, South West Khasi Hills District.
Ha kane ka lympung ïalehkai phainal jong ki khynnah kynthei Under – 17 hapdeng ka Rangthong Christian Higher Secondary School pyrshah ïa ka Little Star Higher Secondary School, Mawkyrwat ha kaba ïa ka nam lahduh la rah da ka Rangthong Christian Higher Secondary School da 2 – 0 kol.
Ïa ki ar tylli ki kol jong ka Rangthong Christian Higher Secondary School la thep da la thep da ka Rosimery Sohshang ha ka minit kaba 21 bad na ka Wanrahjingkmen Khardewsaw ha ka minit kaba 33.
Ha ka jingïalehkai jong ki khynnah shynrang Under-15, ïa ka nam lahduh la rah da ka Maharam Government Higher Secondary School, Mawkyrwat da 2 – 0 kol pyrshah ïa ka Little Star Higher Secondary School, Mawkyrwat, ha kaba ïa ki kol la thep da u Bechanskhem Kharwar ha ka minit kaba 12 bad na u Wanpyndapbor Nongsiej ha ka minit kaba 47.
Nangta, ka jingïalehkai phainal ba khadduh kaba dei jong ki khynnah shynrang Under-17, ïa ka man lahduh la rah da ka Balang Mawlangwir Higher Secondary School, Mawlangwir da 2 – 1 kol pyrshah ïa ka Rangthong Christian Higher Secondary School. Ïa ki ar tylli ki kol jong ka Balang Mawlangwir Higher Secondary School, Mawlangwir la thep da u Kheiñkorlang Thongni ha ka minit kaba 17 bad 38.
Lah ban kdew ba ha kane ka South West Khasi Hills District Level Subroto Cup Football Tournament 2026 ki don baroh 28 tylli ki skul kiba la wan iashimbynta kaba la sdang naduh ka 10 tarik u Jylliew, 2026 bad la pynkut mynta ka sngi ka 2 tarik u Naitung, MDSA ha madan Artificial Turf, MDSA, Nonglang, South West Khasi Hills District.
Ha kane ka sngi ban pynkut ïa kane ka lympung ïalehkai kynjatbol ka kong A.L. Mawlong, IAS, Deputy Commissioner jong ka South West Khasi Hills District ka la long kum ka kongsan ha ryngkat ka jingdonlang ka kong D. Marweiñ, District Sports Officer jong ka South West Khasi Hills District, ki nonghikai, ki khynnah skul lem bad ki nongkitkam ka MDSA.