Jowai, Risaw 29: Ka jingïalehkai phutbol haka kyrdan Super Division Football Tournament 2023 bala ai kyrteng ‘U Kiang Nangbah Memorial Trophy 2023’ ïa kaba la pynïaid da ka West Jaiñtia District Sports Association, (WJDSA) Jowai ha madan Kiang Nangbah Stadium, Dongmihsngi Jowai.
Ha ka jingïakhun kaba long hynnin ka sngi saitjaiñ jong ka taïew ba ladep naka liang jong ka Mukhla Raij kala khur namjop hadien ba pynliem da 2-0 kol ïa ka Khimusniang.
Ka Mukhla Raij ka la ïoh ban pynkhihjar nyngkong lyngba u Meker Pyrtuh haka minit ba 25 jong ka kylla step nangta ka kol kaba ar la thep da u Chandame Suna shuwa ba ka jingïakhun kan jam sha kaba kut (90+1 minit). Ka kynhun ïalehkai jong ka Khimusniang kala pyrshang ban pynphai ïa kitei ki ar kol hynrei kam lah satia haduh ba kut jong ka jingïakhun.
La pyntip ba ka jingïakhun mynta ka Lah Sngi U Blei (30 tarik Risaw, 2023) kan long hapdeng ka Shangpung Lumiawmushai pyrshah ïa ka 7 Wasa United ki ban ïakhun ha ka por 2 baje nohphai sngi.
