Khliehriat, Lber, 09: Na ka daw ka jingpyntrei ïa ka surokbah National Highway-6 ha ka thaiñ Narpuh, East Jaiñtia Hills District ka jingdheng kali kaba jur ka ju jia manla ka sngi ha ka thaiñ Narpuh bad ka ju buh jingeh bad buh jingma haduh katta katta ïa ki nongtrei kiba pyntrei ïa ka surok.
Ban tehlakam ïa ka jingdheng kali ha Narpuh, Mynkre, Lumshnong, Sonapyrdi terter shaduh Ratacherra kam dei ka kam kaba suk lada ka Dhar Construction Construction Pvt. Ltd kam lah ban ai ka jingïatreilang bad ki bor pulit, namar lada shu peit tang ki bor Pulit jong ka Khliehriat, ki Pulit ka Lumshnong bad ki Pulit jong ka Umkiang kin ym lah shuh ban leh eiei. La i donkam ba ka Dhar Constuction ruh ka ladei ban buh ïa ki briew ban ïarap ïa ki Pulit ha kaba pynïaid ïa ki kali khnang ban dup ïaid beit ka rukom pynïaid kali ha ka surok ha Narpuh ba kan nym buh jingma, kan ym buh jingeh than ïa ki nongleit nongwan bad kumjuh ruh ïa ki nongtrei kiba pyntrei ïa ka surok.
Ki nongtrei jong ka Dhar Company ki trei ïa ka kam manla ka sngi ha East Jaiñtia Hills District kynthup ha ka thaiñ Narpuh, hynrei ka jingpyntrei pat ka suki haduh katta katta, wat ki paidbah jong ka thaiñ Narpuh ruh ki kubur bad ki sakhi ïa ka jingsuki ka jingpyntrei ïa ka surok ha ka thaiñ Narpuh.
Ki paidbah ka thaiñ Narpuh ki ong ruh ba ka jingdon ki nongtrei ruh ka duna bha, kumta la donkam ba ka Dhar Company ka ladei ban pynbun wat ïa ki nongtrei ki ban trei ïa ka surok ha Narpuh khnang ba ka kam kan kloi bad ruh ba kan nym buh jingeh than ïa ki paidbah nongleit nongwan bad ym tang katta ïa ka surok ruh yn dup lah ban pyndep ha shwa ka aiom lyiur ba jur slap namar lada ïa ka surok ym lah ban pyndep ha ka por ba biang kan sa buh jingma bad buh jingeh ïa nongleit nongwan lada poi ka aiom slap bad ka jyrsieh ruh kan jur bha ha ka thaiñ.
Ki nongshong shnong kiba na ka thaiñ Narpuh ki la kyntu ruh ïa ka Dhar Company ba ka dei ban da pyntrei bha ïa ka surok khnang ba kan skhem kan neh, ym tang shu trei tang dep, namar ki nongshong shnong ka thaiñ ki la lap bad sakhi ba ka jingpyntrei ïa ka surok kam da biang bha bad ka rukom siang rong ruh imat ka shu long tang na sla namar la lap ba ha shnong Kuliang ka rong ba la siang surok kam skhem bad kam neh eiei ha surok namar imat la shu siang rong tang dep rukom.
