Shillong, Lber 09: Kumba 36 percent na ka jaboh kaba la kot sha ka 1.2 lak metric ton la dep ban pynkhuid na Marten.
Kane ka pynphalang ïa ka jingthmu jong ka sorkar ban weng ïa ka jaboh napoh ki jaka sor.
“Kumba la kular ha ka dorbar mang tyngka kaba la dep, ngi la shim ïa ki sienjam ban pynkhuid noh ïa ka jaboh na Marten ha ka jinglut kaba la kot sha ka T. 30 klur. Kumba ka long mynta 36% jong ka jaboh kaba la poi sha ka 1.2 lakh metric ton la dep ban pynkhuid,” ïathuh u Myntri Rangbah hapoh ïing Dorbar Thaw aiñ ka kylla.
“Nga thikna ba ïa ka jaboh baroh yn sa lah ban pynkhuid na Marten ha kane ka snem mang tyngka ka ban sa wan,” bynrap u Myntri Rangbah.
U la ong ruh ba kum kine ki kam la leh ruh ha Tura bad ban buh ruh ïa ka jaka theh ñuit ha Jowai, Williamnagar, Nongstoiñ bad kiwei ki jaka sor.
Na ka liang u Myntri Rangbah u la kam ruh ba ka sorkar ka la shim ïa ki lad ki lynti ban ïatreilang bad ki dorbar shnong lyngba ka My city campaign ha kaba kane ka la pyni ïa ka jingjop jong ka. Shuh shuh ban pynkhlaiñ ïa kane ka jingïatreilang na ka liang u Myntri Rangbah u la pynbna ïa ka skhim kaba thymmai kaba la khot da ka CM Urban Revitalization Scheme. Hapoh kane ka skhim ki shnong kin ïoh ki lad jingtei bad ki kam pynroi kiba bun rukom.
