Subroto Mukherjee Cup Under-14 2023: Yn ïaknieh namlahduh ka Assam Rifle P. School bad ka Umphyrnai Pres. S. School

Madan Heh-Mawlai, Jylliew 29: Ka kynhun ïalehkai kynjatbol jong ki khynnah Under 14 ka skul Assam Rifle P. School hynnin ka Sngi Palei ka la lah ban pynkhyllem noh ïa ka Sacred Hearts Boys HSS, Mawlai ban bteng ïa ka lynti jong ka sha ka final jong ka Subroto Mukherjee Cup 2023.
Ha kane ka jingïalehkai, ki khynnah kynjotbol jong ka Assam Rifle P. School ki la long kiba kham khlaiñbor ban ïa ka Sacred Hearts Boys HSS da kaba pynbam haduh saw kol ban ïohrung sha ka final.
Ka Assam Rifle P. School ka la ïoh ban sdang pynkhihjar tang hadien 11 minit ba la ïaid ka por lyngba u Medonbanshan Kurkalang kaba la pynlong ïa ka kynhun ban lamkhmat da shi kol ha ka kylla step.
Hadien ba la bteng biang ïa ka jingïalehkai ha ka kylla kaba ar, ki khynnah lehkai jong ka Assam Rifle P. School ki la ïai bteng ban ñion shakhmat bad dei ha ka 49 minit ba u Thoudam Arjun Singh bud sa ka kol kaba lai na u Dhandeep Chetja ha ka minit ba 54.
Ka jingïakhun kam pat shym la kut hangne bad shuwa ba u referee un khylliap noh ïa ka jingïalehkai u Savio Surin jong ka Assam Rifle P. School u la ïoh ban thep sa ïa ka kol kaba saw.
Lyngba kine ki saw kol ka Assam Rifle P. School ka la ïoh ban bteng ïa ka jingïaid lynti shaduh ka final.
Sa ha kawei pat ka jingïalehkai, ki khynnah skul jong ka ïewrynghep Sec. School ki la shah pynkhyllem noh lyngba ka tie breaker ha ka Umphyrnai Pres. Sec. School.
Haba phai sha ka jingïakhun hapdeng kine ki arliang mamla kaba la long hapdeng u slap ba jur, ka la long shisha kaba itynnat bad baroh arliang ki la ïoh mar kajuh ki kabu ban pynkhihjar.
Ka Umphyrnai Pres. Sec. School ka la ïoh ban lamkhmat nyngkong ïa ka jingïakhun lyngba ka shi kol kaba la thep da u Damebantei Kharkongor ha ka minit ba 24 shuwa ban kut ka kylla step.
Hynrei na ka liang jong ka ïewrynghep Sec. School ka la wanphai da kaba tyngeh ha ka kylla kaba ar bad ïoh ban pynïakhaid ha ka 46 minit lyngba u Arwisstar Khawmawphlang kaba la pynlong ïa kine ki ar kynhun ban ïakhaid haduh kaba kut jong ka 60 minit bad jam sha ka extra time.
Ha ka extra time, ka ïewrynghep Sec. School ka la ïoh mynsiem ban khur ïa ka namjop lyngba ka kol u Endrick Nongkhlaw (66 minit) hynrei phewse ka la shah pynïakhaid noh ha ka 74 minit lyngba u Ricky Kharkongor kaba la pyllait ïa ka Umphyrnai Pres. Sec. School na ka namrem.
Dei ha ka tie breaker ba ka Umphyrnai Pres. Sec. School ka la lah ban pynkyllem noh ïa ka ïewrynghep Sec. School ban bteng ïa ka lynti ïaid sha ka final. Ka jingïaknieh namlahduh na ka kyrdan ïakhun Under-14 kan long hapdeng ka Assam Rifle P. School pyrshah ïa ka Umphyrnai Pres. Sec. School.