Suba ka FKJGP ba khang ka NEIGRIHMS ban pynitynnad ïa ka jaka sumar ha sngi Khrismas

Shillong, Nohprah 06: Ka Federation of Khasi Jaiñtia and Garo People ka la leit ban ïakynduh ïa u Deputy Director ka North Eastern Indira Gandhi Regional Institute of Health and Medical Sciences (NEIGRIHMS) u Lt. Cdr. Pawan Deep.
Kane ka jingleit kynduh ïa u Deputy Director ka long hadien ba ka seng ka ïoh jingujor ba u Director u Dr. Nalin Mehta u la mana ïa ki nongtrei kiba dei ki Khristan ban jingpynitynnad ïa ka Hospital ha ka por Khristmas. Ïa ka kynhun jong ka FKJGP la ïalam khmat da u Senior Vice President ka Seng U Bah Elton Cliff Warjri.
Ha kane ka jingïakynduh jong ka Seng bad u Deputy Director ka NEIGRIHMS, u la ong ba ym don jingthmu satia ban khang ban pynitynnad ïa ka Hospital ha ka por Khristmas.
Tangba ka seng ka la ïoh ïa ka jingtip ba tikna ba la don ka jingpyrshang ba nym shah pynitynnad ïa ka hospital ha ka por Khristmas. Shuh shuh ka seng ka ïoh jingtip ruh ba ha ka 5 tarik u Nohprah U Director u la don ka jingïalang bad ki nongtrei ka NEIGRIHMS bad u la shah ban pynitynnad ïa ka hospital.
Ka Seng ka pynpaw ïa ka jingsngew lyngngoh ba naduh ba sdang ka NEIGRIHMS ban shakri ïa ki paidbah ka jylla bad ka thaiñ Shatei Lammihngi kam don ka jingpynthut ban lehkmen Khristmas hynrei mynta u snem kynsan kynsan ka mih kane ka hukum.
Ka jing pyniphuh iphieng ïa ka Hospital na bynta ka Khristmas ka nym pynthut satia ïa ki nongpang namar nym don kano kano ka jingsawa.
Ha kaba ïadei bad kane na ka liang ka seng ka ngeit ruh ba ha ki snem ki ban wan kum kine ki jingpynwit ki nym don shuh bad kaba lah ban jingsngewsih ïa ki paid Khristan jong ka jylla, ong ka kyrwoh ba la phah da u Bah Elton Cliff Warjri Senior Vice President FKJGP.