Shillong, Naiwieng 02: Ka jingïakhun ba itynnat jong ka Meghalaya ha ka lympung ïalehkai Sub-Junior Boys National Football Championship 2025-26 (Tier 2) ka la poi sha kaba kut ha ka semifinal hadien ba ka la shah rem noh ha ka Telangana da 3-1 kol ha ka jingïalehkai ka ba la jlan shaduh ka extra time ha Narainpur, Chhattisgarh, ha ka step jong ka sngi Saitjaiñ.
Ka Meghalaya ka la jop ïa baroh lai tylli ki jingïalehkai jong ka ha ka Group C ban ïohrung sha ka wat ïakhun Knockout hynrei ka Telangana ka la leh kumjuh ha ka Group A bad ka la long ka kynhun liang pyrshah kaba khlaiñ bad kaba shyrkhei bha.
Hadien ka jingïakhun kaba khlem kol kumba shi kynta, ka Meghalaya ba la pynïaid da u Dapmon Tariang ka la ïoh ban pynkhihjar nyngkong lyngba u rangïalehkai ba tbit u Marbiang Marwein (60’), kaba dei artad ka kol kaba shiphew jong u ha kane ka lympung.
Hynrei kiei kiei ki la sdang ban ïaid pyrshah ïa ka Meghalaya, ha kaba ka la shah pynduna sha ka shiphew ngut hadien ba ïoh red card beit beit u Elvin Joe Kharsahnoh ha ka minit kaba 72. Wat hapdeng ka jingpyrshang kaba tyngeh hynrei ka jingduna rangïalehkai ka la pynkordit ïa ka kynhun bad kim shym la lah ban khanglad ïa ka Telangana kaba la pynïakhaid lyngba u Stolzer Kamson (80’).
Namar ka jingïakhaid kaba mar 1-1 hadien 90 minit, la pynjlan ïa ka jingïalehkai sha ka shiteng kynta (extra time) bad dei hangne ba ka Telangana ka la pynkhihjar ar sien ban khur ïa ka jingjop ha ka semifinal. U Stolzer (110’) bad u Mohammed Anas (120’+2) ki dei kiba la thep ïa kine ki kol bad u Stolzer u la shah jied ban khur ïa ka nam Player of the Match.
Ka dei ka jingshah rem kaba kthang ban pdiang na ka bynta ki khynnah ïalehkai jong ka Meghalaya hadien ba ki la sei lut ïa kiei kiei baroh kiba ki don shabar ha madan ïalehkai. Ki la don katto katne ki jingïalehkai kiba itynnad bad kiba kyrpang mynta u snem na ka kynhun bad la thikna ba bun na ki nongïalehkai ka Meghalaya kin sa ïoh ban mihkhmat biang ïa ka jylla ha ki lympung ban wan.
