Rung Semi Final sa ka Mawlai ha ka SSA Super Cup 2025; pynliem ïa ka Sawmer lyngba ka tie breaker

Shillong, Naiwieng 02: Ka lympung phutbol ‘SSA Super Cup 2025’ ka la wanrah ïa kawei na ki jingïakhun kaba shyrkhei bad kaba itynnat bha hadien ba ka Mawlai ka la shah pynbor ban ïakhun dohïap ban ïoh ïa ka jingjop kaba 5-4 lyngba ka tie breaker pyrshah ïa ka Sawmer hadien ba ka extra time ka la kut noh da mar 3-3 kol ha ka jingïakhun playoff kaba ar ha madan First Ground-SSA Stadium, Polo, ha ka sngi Saitjaiñ.
Kane ka jingïalehkai kaba pynkhihwin ka la sakhi ïa ka Sawmer ba ka la lamkhmat arsien shuwa ba kan khyllem noh ha kaba khatduh. Ka Mawlai ka la pyndep ïa ki penalty ha ka rukom kaba janai bha, da kaba pynrung baroh san sien na jaka shut, katba ka Sawmer ka la don kawei ka penalty, ba la shut da u Orestar Sad, kaba la shah kyntait ha u nongap kol ka Mawlai, u Damangbha Rymbai.
Ka jingïakhun ka la long kaba ïakhaid bha wat hapdeng ka jingïalehkai – da kaba ïakhaid mar 1-1 kol ha ka kylla step, 2-2 hadien 90 minit bad 3-3 hadien ka por ba la pynjlan (extra time). Na ka bynta ka Sawmer kiba la pynkhihjar ki long u Bickyson Kharkongor (10’) bad u Diego Khyriem (90’+2, 96’) katba na ka bynta ka Mawlai la thep da u Robertson Khongriah (20’), u Banraplang Pyngrope (53’) bad u Mewan Rasmut (97’).
Ka SSA Super Cup, ba la pynlong da ka Shillong Sports Association, ka bynrap sa kawei pat ka kyrdan jong ka jingïakhun na ka bynta ki nongkyrshan, ha kaba ki hynriew tylli ki kynhun ne ki klob ba kynsai tam (Top 6) na ka Shillong Premier League 2025 ki ïakhun ha ka lympung kaba tang shi wait lane knockout. Kum ka lahduh jong ka SPL 2025 ka Langsning bad kaba wan baar ka Shillong Lajong, baroh ar ki la ïoh rung beit beit sha ka Semi final.
Haba phaidien, ka Rangdajied United ka la pynliem ïa ka Nangkiew Irat da 3-0 kol ha ka playoff kaba nyngkong ha ka sngi Thohdieng, bad hynnin ka sngi ka la dei ka pali ïa ka Mawlai bad ka Sawmer kiba la wan ha ka kyrdan kaba lai bad kaba hynriew ha ka thup kyrdan jong ka SPL, ban pynthikna ïa ka jaka ba dang sah thylli ha ka semifinal.
Hapdeng jong ki, ka Sawmer ka la shah pynliem ha ka Mawlai da 6-2 kol ha ka jingïakhun SPL mynta u snem bad ka la shah rem ha man ki jingïalehkai ba ka ïakynduh pyrshah ïa ka Mawlai ha ki ar samoi ba ladep.
Hynrei dei ma ki pat kiba la lamkhmat nyngkong ha ka minit kaba 10 lyngba u Bickyson. Ka Mawlai ka la trei shitom ban pynïakhaid bad ka la ïoh ïa ka, hadien ba u Robert u la ïoh ban shu pyndei tiak da ka kjat ïa ka bol ba la pyrshang thep da u Shelblikstar Kharshilot, kaba la pynlong u rangap kol ka Sawmer u Edison Suna, ban nym lah satia ban khanglad.
Katto katne por hadien ba la ïaid ka kylla miet, u Banraplang u la thep na ka free-kick kaba pynlong ïa ka Mawlai ban lamkhmat.
Ha ki minit ba khatduh ka Sawmer ka la pynjur ban tur shakhmat hynrei ka por ka la paw kumba ka Mawlai kan pynkut da ka jingjop tangba u Diego u don da kiwei pat ki jingthmu, ha kaba u la pynkhih ïa ka kol ha ki minit pynjlan shuwa ban kut ban pynïakhaid ïa ka jingïalehkai.
Kane ka la pynbor ïa ka jingïalehkai sha ka 30 minit jong ka extra time hynrei ka la shimpor tang hynriew minit shuwa ba u Diego un pynkhih ïa ka kol kaba ar bad kaba lai na ka bynta ka Sawmer. Hynrei ka jingkmen jong ka la neh tang shipor namar ba ka Mawlai ka la jubab mardor, bad ha kane ka kynti, ïa ka kol la thep da u nongïalehkai ba mih bujli u Mewan Rasmut, wat hadpeng ka jingshah kerkut ha katto katne ngut ki nongïalehkai ba shadien jong ka Sawmer.
Ka yellow card kaba ar na ka bynta u Banman Roy Nongsiej ka Sawmer kam shym la don kano kano ka jingktah namar ka la jia tang shu kut ka extra time. Ka Sawmer ka la bujli ïa u nongap kol, da kaba wanrah ïa u Jeffrey Jyrwa ha jaka jong u Edison, tang shuwa ban jam sha ka tiebreaker hynrei ka Mawlai kam shym la bujli nongap kol da kaba pynsah ïa u Damangbha.
U Damang u la shong ben ha baroh kawei ka aïom jong ka SPL bad u la shah thep lai sien tang ha kane ka jingïalehkai hynnin ka sngi. Hynrei kane kam shym la ktah ne pynduh jingkyrmen ïa u, pynban, u la lah ban kyntait ïa ka penalty jong u Orestar ban ïalam ïa ka Mawlai sha ka jingjop.
Na ka bynta ka jingïalehkai ba kyrpang kum u rangapdien, u Banraplang ka Mawlai u la shah jied kum u T7 Player of the Match bad u la ïoh ruh ïa ka memento ryngkat ka cheque kaba T.5 hajar na u President ka SSA u Bah Banteidor Lyngdoh MLA.
Ki khmat mynta kin phai sha ki saw tylli ki kynhun ba khatduh. Ka Rangdajied kan ïakhun pyrshah ïa ka Langsning ha ka semifinal ba nyngkong ha ka 07 tarik Naiwieng, katba ka Mawlai kan ïakhun pyrshah ïa ka Lajong ha ka sngi kaba bud. Baroh ar tylli ki jingïalehkai kin sdang ha ka por 5 baje janmiet.