Shillong, Nailur 11: Ka kynhun ïalehkai jong ka jylla Meghalaya ka la shah weng noh ban ïakhun ha ka lympung Sub-Junior Boys’ National Football Championship (Tier 1) hadien ba la shem ba katto katne ki player jong ka kynhun ki la tam palat ïa ka snem ba la buh.
Katkum ki khubor la ong ba ka Meghalaya bad ka Arunachal Pradesh ki dei ki ar kynhun ba la shah weng namar kane ka daw. Kane ka lympung la pynlong ha Bangalore naduh ka 7 tarik mynta u Nailur. Bad katkum ka prokram ba la pynbeit ka kynhun Meghalaya ka la shah pynïakap hapoh ka Group C ryngkat ka Mizoram, Odisha bad Delhi, katba ka Arunachal ka la shah pynngat ha ka Group A ryngkat ka Karnataka, Punjab bad Bihar.
Hadien ka jingshah weng noh jong kine ki ar kynhun, baroh ar group (A bad C) ki la sah satang mar lai kynhun.
Lah ban kdew ba ka jingkhmih bñiah ïa ki rta jong ki player ka ïapher. Ki nongpynïaid ki pyndonkam da ki tiar ba khampher ban pyrshang bad pynthikna ba ki player ki dang ha ka rta kumba la buh. Kane ka sdang naduh ka jingkhmih bñiah ïa ki syrnod sngi kha (Birth Certificate), ka jingpeit ïa ki bniat jong u khynnah nangta ki X-ray bad ki MRI.
Lah ban ong ba ka Meghalaya ka dei kawei na ki jylla ba khlaiñbor ha kane ka lympung, da kaba ïohrah namlahduh la bun sien, dang shen ha u snem 2019-20. Kaba jia ryngkhat long ba ka kynhun ba ka ïakynduh ha ka final ha utei u snem ka dei ka Arunachal.
