Ka jingpyntreikam jong ka tnat Pulit ïa ka bor ka iktiar ba la pynkup bor katkum ka aiñ ka la pynshyrkhei ïa ki nongleh kam bymman bad ïa ki kam runar ruser ha kiba bun ki bynta jong ka nongbah Shillong. Ka jingïatreilang jong ki Dorbar Shnong, ki Seng Samla Shnong bad ki Seng Kynthei ka la ïarap haduh katta katta ïa ka tnat Pulit ban tehlakam ïa ki kam bymman bad ïa ki jingjia ba harrukom ha ki bynta bapher bapher jong ka nongbah Shillong.
Naduh ka sngi ba ka Sorkar Jylla ka la bynshet ha ka tnat Pulit ban paraha ha ki jaka kiba kham kynrei ki jingsniew bad kiba ju jia khah khah ki jingïakajia bad ki jingïashoh ïadat, kine ki jait kam ki la stait hi ïar.
Shabas! Kong Rosetta M. Kurbah kum ka Deputy Commissioner jong ka East Khasi Hills District phi la leh ïa ka kamram kaba pynkmen haduh katta katta ïa kiba bun ki longing longsem bad ïa ki paidbah nongshong shnong jong ka Sor Shillong. Shabas! Bah S. Nongtnger, kum u Superintendent of Police jong ka East Khasi Hills District phi la pyndep ïa kamram ba la bynshet ha phi ban pynneh biang ïa ka shongsuk shongsaiñ ha nongbah Shillong.
Ki jingjia kiba harrukom bad kiba mih laiphew jait kiba la jïa ha ki por baladep ka la pynhiardor haduh katta ha baroh kawei ka nongbah Shillong. Ki briew kiba wankai nabar ka jylla ki tang shu tip lyngba ki lad pathai khubor ïa ki jingjia balaiphew jait ki don hapdeng ka jingsyier mynsiem.
Ki jaka kum ka Khyndai Lad, ka Urkaliar bad ka thaiñ Polo ki dei ki ktem kiba pynïasaitmet haduh katta katta ïa ki nongleit nongwan namarba ha kine ki lai tylli ki jaka, ki don lut baroh ki jaidbynriew kiba leh ïa ki kam kiba har rukom.
Ka jingthnem ka Urkaliar ha ka por shiteng synñia ka dei ka jingdon ki ktem die kyiad be-aiñ. Ka thaiñ Polo ka paw kum ka jaka kaba thnem bha ka jingkhaii be-aiñ pylleiñ pylleiñ ïa u drok wat ha ka por mynsngi mynshai. Na ka por sha ka por ki Pulit ka East Khasi Hills ki ju ïohkem ym tang ïa ki nongdie hynrei wat ïa ki nongdih drok kiba la im kyrni ha u drok wat ban peit ïa ka durkhmat jong ki ruh ka long kaba isaitmet haduh katta katta. Ka Khyndai Lad, ha ka por mynmiet ka thnem bha namar ka jingdon jong ki briew kiba ju im lali ha ka kam khaii met. Ka jingïohkem jong ki Pulit ïa ki 15 ngut ki briew kiba die met na Khyndai Lad dang shen ka la pynshisha ïa kata bad yn ym lah satia ban len.
Lada ka tnat Pulit ka ïai pynjur ïa ki jingpyrkhing ban pahara ïa ka nongbah Shillong ha ka por mynmiet, khlempep wat ki nongleh kam sniew ruh kin sheptieng ïa ki kynjri jong ka aiñ. Ha khmat ka Aiñ, lada pyntreikam hok, yn ym don satia mano mano ruh ba shlan ban ieng pyrshah.
Ka jingïohkem jong ki Pulit ïa ki snar khaii drok khamtam kiba na ka jylla Manipur ka la nang pyntroiñ shuh shuh ïa ka jingpynrung ïa une u jingdih pynbuaid ha kane ka jylla. Dei ban ai jingïaroh ïa ka tnat Pulit kiba trei shitom miet la bad sngi ban kem naphang ïa ki trai jylla bad ïa ki bar jylla kiba donkti ban pynrung beaiñ ïa u drok sha kane ka jylla Meghalaya.
Ka shong eh ha ki longing longsem ban tehlakam ïa ki khun ki kti kiba ju mlien ban shang miet shang iong bad im sha surok ha ka por shiteng miet bad im ïa ka jingim sahuh khlem don shuh ka tip briew tip Blei.
Ki Dorbar Shnong lada ki angnud ïa ka shongshong shongsaiñ ki dei ban pahara ïa ka shnong ka thaw lada ki don shisha ïa ka mynsiem ban pynbha ïa ka imlang ka sahlang namar khlem ka jingïatreilang jong ki Dorbar Shnong ki bor sorkar kin shem jingeh ban pynneh pynsah ïa ka shongsuk shongsaiñ ha manla ki shnong ki thaw.
Ngi kyrmen ïa kaba bha ba ka jingpynjari Section 144 CrPC naduh ka por 11:30 baje mynmiet kan pynthanda ïa ka jingleh shongshit jong ki khynnah samla kiba dang khluit ka snam bad kiba dang leh shongshit khlem pyrkhat ïa ka apot kaba ap hadien.
