Resubelpara, Jymmang, 08: Ka Seng Congress ha Resubelpara ka la pra hi phom hadien ba ki nongkyrshan ki la leit pynïasoh sha ka All India Trinamool Congress ha ka jingïalang kaba long ha ka sngi Saitjaiñ ha Jonglapara Community Hall, North Garo Hills.
Ha kane ka sngi, la thaw ruh ïa ka Resubelpara Block Youth Trinamool Congress Committee da ka jingïashim bynta jong ki phew spah ngut ki nongkyrshan ba kynthup ïa ki samla bad ki nongïalam barim jong ka Seng Congress.
Ha ka jingïalang,la ïathir ïatai sani kumno ban pynkhlaiñ ïa ka AITC ha ki Grassroot Level bad ha ki Polling Booth Level na ka bynta ka elekshon ka ban sa long ha u snem 2023.
La ïashim bynta lang ha kane ka jingïalang da u MDC ka TMC na Rongrong Constituency, u kyrtong na Resubelpara Assembly Constituency u Rinaldo K Sangma bad u MDC ka TMC na North Garo Hills, u District President bad u kyrtong ka TMC na Kharkutta Constituency u Cherak W Momin.
Haba kren ha kane ka jingïalang u Rinaldo K Sangma ula ong ba ka jingwan ïashim bynta jong ki paidbah kiba ju ai jingkyrshan ïa u mynba u dang don ha ka Seng Congress ka la pynpaw ba da ki hajar ngut ki nongkyrshan jong ka Resubelpara Congress Party ki la mih ryngkat lang bad u Dr. Mukul Sangma ban pynïasoh sha ka All India Trinamool Congress (AITC).
Ka jingwan ïashim bynta jong ki paidbah na kylleng ki shnong jong ka Resubelpara Constituency ka pyni ba ki paidbah ki don ka jingshaniah ha ki nongïalam lajong. Ki paidbah jong ka North Garo Hills ki kitram shikatdei eh ha u Dr. Mukul Sangma uba la wanrah ïa ki song pynroi hapoh ka District bad khamtam eh ha Resubelpara, ong u Rinaldo.
“Ki paidbah jong ka North Garo Hills na ki saw tylli ki Constituency kin sa wanrah biang ïa u (Dr. Mukul) sha ka bor,” la bynrap u Rinaldi.
U Cherak W Momin uba la long kum u Kongsan ha kane ka sngi u la kynnoh ba ka Sorkar ba mynta hapoh ka jingïalam jong u Conrad Sangma kam shym la lah ban pynurlong ïa ki kular ba la khlei bad kynnoh ruh ba kane ka Sorkar ka la ñiat sharud ïa ki District Council ha kaba ïadei bad ka jingïapynbeit ïa u pud u sam. “Ki paidbah ka rilum Garo ki dei ban ïatylli lang kawei ban jynrat noh ïa ki nongïalam kiba shu im sngi tang ban pynriewspah ïalade shimet,” ong shuh shuh u Momin.
“Ka por ka la wan ban pynkylla noh ïa ka Sorkar na ka bynta ka bha ka miat jong ki paid Garo bad ka Jylla Meghalaya baroh kawei,” u la bynrap.
Ha kane ka jingïalang la jied ïa ki nongkitkam jong ka Resubelpara Block Youth Trinamool Congress Committeeda kaba pynkhamti ïa ka kam President ha u Sengbath Marak, Secretary Nicholas Sangma, Vice President Salning Marak, Brithuil Momin bad Sengran Momin, Joint Secretary Kasan Sangma, Sengjan Sangma bad Keny Sangma, Organizing Secretary Babut G Momin, Accontant Twatyan Momin, Treasurer Bonkam Arengh, Games & Sports Cultural Secretary Chanang Mara, Social Media Co-ordinator Sundeep N. Marak, Advisers Rinaldo K Sangma MDC bad Sofic Marak.
