SSA Women’s League: Pynkut ka Kick Start bad ka Synroplang ïa ka samoi da ka namjop

Shillong, Naitung 18: Ka kynhun ïalehkai kynjat bol jong ka Kick Start Football Coaching Centre ryngkat bad ka Synroplang 77 ki la ïoh ban khylliap noh ïa ka jingïaidlynti jong ki ha kane ka samoi lehkai jong ka Shillong Sports Association’s Women’s League 2023 da ka namjop hynne ka Sngi Hat Majai.
Ka Kick Start ka la lah ban pynliem ïa ka Mawkriah West SC haduh 6-0 kol na ka thup jong ka Group A, katba ka Synroplang ka la pynliem ïa ka Kharang SC haduh 5-0 kol na ka thup jong ka Group B.
Watla kine ki jingïakhun kim nym ïarap ïa ki kynhun ban bteng ïa ka lynti ïaid ha kane ka lympung namar la dep ban thikna lypa ïa ki saw kynhun kiba ïoh ïakhun ha ka semi final, baroh saw kynhun kiba ïalehkai ha kane ka sngi kaba khadduh jong ka jingïalehkai Group Stage ki la pyndep da ka mynsiem ïakhun kaba shongshit- Ka Mawkriah West bad ka Kharang ki don ha ka khep ban ïoh khur ïa ki lai point kiba nyngkong ka jong ki, katba ka Kick Start ryngkat bad ka Synroplang ki don ha ka lynti ban kyntiew ïalade ha ka miej kheiñ point napoh Group.
Ka Kick Start ka donkam ban jop khnang ban kyntiew ïalade sha ka kyrdan ba lai jong ka Group A ban tam shakhmat ïa ka Lawei Smit SC hynrei ka dang sah dien. Baroh ar kynhun ki la ïoh ban pyndep ïa ki jingïalehkai napoh Group da 7 point hadien ba ki la ïakhaid ha ka jingïakynduh ka jong ki ha ka 21 tarik u Naitung kaba la kut da 0-0 hynrei ka Lawei ka la ïoh ban ïaineh ha ka kyrdan ba lai lyngba ka jingïapher kol (goal difference), kata da -1 to -2.
Na ka bynta ka Kick Start, ïa ki kol la ïoh ban thep da ka Eliva Kurkalang (5′), Shimtilang Thongni (19′), Banteilang Makri (26′), Daia Mawkhroh (47′, 49′) and Aidaris Kharmalki (60′).
Katba ha ka jingïalehkai kaba bud, ka Synroplang ka la ïoh ban kyntiew ïalade sha ka kyrdan ba saw, hadien ba ki la jop ïa ka Iasnohktilang Madanrting FC. ka Daniela Mylliemngap (31′) ka la ïoh ban thep ïa ka kol kaba nyngkong nangta ka Ibannika Kharshiing ka la thep ar kol (41′, 53′), shi kol na ka Medariiaka Kharkongor (50′) bad na i Peacefully Nongrum (65′).
Hadien ba ka la ïoh ban jop ar sien lynter, ka Synroplang ka la pyndep ïa ka samoi da 6 point, katba ka Iasnohktilang ka la khylliap ïa ka samoi da 4 poiñ.
Hadien lai sngi, ïa baroh ar ki jingïakhun semi final jong ka Women’s League yn sa pynlong ha ka Sngi Saitjaiñ hapoh SSA Stadium ha First Ground.
Ka kynhun ba bat kyrdan ba nyngkong jong ka Group A, kata ka Laitkor SC kan aireng pyrshah ïa ka Lumparing SC (runner up Group B) ha ka por 2 nohphaisngi, bud sa ka jingïalehkai (winner Group B) jong ka lahduh samoi ba ladep, ka Mawlai SC pyrshah ïa ka PFR Academy (runners-up Group A) ha ka por 4 jan miet. Bad ïa ki Ticket lah ban ïoh na katei ka jaka ban sa pynlong. Ki nongjop ha kane ka jingïakhun kin sa ïakynduh ha ka final, ka ban sa long ha ka 29 Naitung ha ka por 4 ha First Ground.