SSA U-20 Fourth Division 2025: Pynliem ka Nongthymmai RN ïa ka Dilingiem da 3-2 kol

SHILLONG, Naitung 03: U Shaiñ Hujai u la pynkhih ar tylli ki kol kiba kongsan kaba la ïarap ïa ka Nongthymmai R Nongkynrih SC ban pynliem ïa ka Dilingiem SC da 3-2 kol (Group C) ha kawei na ki jingïalehkai jong ka lympung Shillong Sports Association U-20 Fourth Division 2025, hynne ka sngi Palei ha madan First Ground-SSA Stadium, Polo.
Baroh ar liang mamla ki la ïoh ban lamkhmat mar kylliang ïa ka jingïalehkai ha ka kylla step da kaba thep mar 2-2 kol, hynrei ka Nongthymmai R Nongkynrih ka la ïoh ban pynkhih ïa ka namtam shuwa ban kut ka 80 minit ha ka kylla miet.
Tang katto katne minit ba la ïaid ka por, u Aiboklang Jyrwa (12’min) u la buh hakhmat ïa ka Dilingiem tang ban shah pynïakhaid noh hadien 5 minit, ha kaba ka Nongthymmai RN ka la pynkhihjar lyngba u Aryan Nongkhlaw (17’min).
Hadien nangta ka Nongthymmai RN ka la ïoh ban lamkhmat kylla ïa ka jingïalehkai ha ka 31 minit lyngba ka kol ba la thep da u Shaiñ Hujai, hynrei sa shi sien pat ka jingïakhun ka la ïakhaid biang namar ba ka Dilingiem ka la thep biang sa kawei lyngba u Nelberistar Syiemlieh (37’min).
Ha ka por ba baroh ki la pyrkhat ba kane ka jingïalehkai kan kut da kaba ïasam mar shi point u Shaiñ Hujai u la pynkhih ïa ka namtam ha ka minit kaba 75 kaba la pynïoh ïa ka Nongthymmai RN ban khur pura ïa ki lai point.