Shillong, Naitung 23: Ka Lummawbah SC ka la wanphai nadien ban pynliem ïa ka Mawnianglah SC da 2-1 kol ha ka jingïalehkai ba khatduh jong ka Pool 3 bad ban pynthikna ïa ka jaka ha ka quarterfinals jong ka lympung U-20 Fourth Division 2025 ba la pynïaid da ka Shillong Sports Association ha madan First Ground-SSA Stadium, Polo.
Kumba ka long, ka Mawkasiang ka la dep pynthikna lypa ïa ka jaka ha ka Quarter final na ka Pool 3 bad ka jingïakhun hapdeng ka Lummawbah bad ka Mawnianglah ka long na bynta ka kyrdan ba ar.
Shuwa kane ka jingïalehkai, ka Lummawbah (-1) ka don ïa ka jingkyrmen kaba kham skhem ban ïa ka liang pyrshah da ka jingïapher kol kaba kham bha bad kumta ka donkam tang ban ïakhaid, katba ka Mawnianglah (-2) pat ka donkam ïa ka jingjop ban ïoh rung.
Ka Mawnianglah ka la ïoh ban pynkhihjar nyngkong ha ka minit kaba 18 lyngba u Elnathan Teinam Lyngdoh ban lamkhmat ïa ka jingïalehkai ha ka kylla step.
Hynrei hadien katto katne minit ba la ïaid ka kylla miet, u nongapkol ka Mawnianglah u la kum pynur ïa uwei u rangïalehkai ka Lummawbah katba u dang pyrshang ban kem ïa ka bol bad u referee um shym la artatien satia ban ai da ka penalty, ïa kaba la pynrung da u Mewanshngain Ryntathiang (45’P).
Hadien nangta u Bajiedlang Rangslang (59’) uba la trei shitom ha baroh kawei ka jingïakhun, u la pynkhih ïa ka kol kaba ar ban pynskhem ïa ka jingjop.
Ha kane ka sngi Palei yn sakhi ïa ka jingïakhun kaba khatduh jong ka Pool 4 hapdeng ka Laitkroh SC pyrshah ïa ka Lumpyngngad SC ha ka por 4 baje janmiet.
