SSA U-20 4th Division: Rung Quarter final sa ka Umiew Maw U Sam bad ka Nongkolew

0

Shillong, Naitung 29: Sa ar tylli ki kynhun ba kynthup ïa ka Umiew Maw U Sam bad ka Nongkolew SC ki la ïoh ban pynthikna ïalade ban jam sha ka wat ïakhun Quarter final ha ka Under-20 Fourth Division jong ka Shillong Sports Association da ka namjop ha ka Pre-Quarter final hynne ka Lah Sngi U Blei, ha SSA Ground, Polo.
Lah ban kdew ba ka jingïakhun kaba itynnat tam ka dei ka jingïakhun hapdeng ka Umiew Maw U Sam pyrshah ïa ka Pynthorbah SC. Ka Umiew Maw U Sam, ka lahduh jong ka Group B ka la pynjemkhnap ïa ka liang pyrshah haduh 6 kol ban khur ïa ka namjop.
U Eric Nongrum u la long u namtam ha kane ka jingïalehkai da kaba khyrwit ïa ka hat trict (22, 34 bad ha ka 50 minit), katba u Eller C Allya (32 min), u Emanuel Rongrin (65min) bad u Banteishaphrang Lymba (70+1min) ki la ïoh ban pynkhih mar shi kol. Ha ka jingïakhun kaba ar la sakhi ïa ka Nongkolew SC kaba la jop da ka said ïa ka Mawlynrei SC da tang shi kol. ïa kane ka namtam la thep da u Pynshngain Majai (32 minit) kaba la biang pura ïa ka kynhun ban khur ïa ka jingjop.
Lah ban kdew hangne ba ki saw tylli ki kynhun, ba kynthup ïa ka Umrynjah SC, Laitkroh SC lem bad ar tylli ki kynhun ba jop hynne ka sngi, ka Umiew Maw U Sam bad ka Nongkolew ki la dep ban pynthikna ïalade ban ïakhun ha ka Quarter final.
Ka jingïaknieh rung Quarter final mynta ka sngi kan long hapdeng ka Nongthymmai SC Raijnongkynrih pyrshah ïa ka Them Rangshken ACC ha ka por 1:30 baje mynsngi, nangta ka jingïakhun kaba ar kan sdang ha ka por 4 baje nohphai sngi hapdeng ka Mawphlang SC pyrshah ïa ka Madanryting SC. Baroh ar ki jingïakhun kin long hapoh SSA Stadium, Polo.

Leave A Reply

Your email address will not be published.