Shillong, Naitung 07: Ka Them Rangshken ACC bad ka Lummawbah SC ki la jop ïa la ki jong ki jong ki jingïalehkai ban pynthikna ïa ka kyrdan Top-2 ha ka Group B ha ka lympung U-20 Fourth Division 2025 jong ka Shillong Sports Association, ha madan First Ground-SSA Stadium, Polo. Kawei pat ka jingïalehkai jong kane ka sngi hapdeng ka Lawei SC bad ka Lumpyngngad SC ka la kut ha ka jingïakhaid.
Ka shi kol jong u Tyngshainlang Kharmawlong (40’min) ka la biang pura ïa ka Lummawbah ban pynliem ïa ka Mawlyngngad, kaba ïa ryngkat mar 4 point shuwa kane ka jingïakhun.
Ka jingïalehkai kaba bud na ka Group F, ka Lawei bad ka Lumpyngngad ki la ïakhaid da mar kawei. Na bynta ka Lawei ka kol la thep da u Rishailang Mamar (10’min) katba ka Lumpynggad ka la pynïakhaid lyngba u Donlang Kharsyiemiong (19’min).
Ha ka jingïalehkai kaba khatduh ka Them Rangskhen ACC ka la pynjemkhnap haduh 5-1 kol ïa ka Nongkohlew. U Neban Janong (3′), Elban Kurbah (39′, 48′), Gilbert Kurbah (40’+3) bad u Peristar Kharphuli (80’+3) ki la pynkhihjar na bynta ka Them Rangshken, katba ka shi kol na ka Nongkohlew la thep da u Pynshailang Ryntathiang (9’min).
Ka prokram ïalehkai mynta ka sngi ka long: Mawkasiang pyrshah ïa ka Nongthymmai Nongkynrih, ha ka por 10 shiteng mynstep, nangta ka Lapalang pyrshah ïa ka Summit FA, ha ka por 1 baje shiteng mynsngi, bad khatduh ka Mawphlang pyrshah ïa ka Umsohsun ha ka por 4 baje janmiet.
