SHILLONG, Rymphang 02: San tylli ki kynhun, ka Pay For Rights FA, Rangdajied United FC, Mawkhar SC, Umphyrnai SC bad ka Shillong Lajong FC ki la jop ïa la ki jong ki jingïalehkai ha ka lympung Shillong Sports Association U-14 Football league 2025-26 kiba la long hynne ka sngi Nyngkong (02.02.2026) ha SSA Ground, Polo.
Shuwa ka jingjop na ka bynta kitei ki san tylli ki kynhun ka jingïalehkai ba nyngkong ha ka por 9 baje mynstep, ka la kut ha ka jingïakhaid, ha kaba ka Diengpasoh SC bad ka Umlyngka SC ki la ïa thep mar shi kol. Na ka Diengpasoh la thep da u M.Nongpluh (54’) bad ka Umlyngka la thep da u B.Majaw (22’).
Ha ka jingïalehkai kaba bud, ka PFR FA ka la jop da 5-1 kol ïa ka Mawshbuit SC. U H.Blah (11, 21,40 & 41’) u la pynkhihjar haduh saw sien na bynta ka PFR FA, katba kawei la thep da u N.Kharkongor (1’). Ka Mawshbuit ka la ïoh pynphai kawei lyngba ka kol ba kum thep hi (Own Goal) ha ka minit kaba 32.
Nangta ka Rangdajied United FC ka la jop da 2-1 pyrshah ïa ka Marbisu SC lyngba ki ar kol ba la thep da u B.Suting (19’) bad u M.Shylla (32’). Ka Marbisu ka la pynïakhaid shipor lyngba u M.Nongbsap (25’).
Ka Mawkhar SC ka la pynliem noh da 3-2 kol ïa ka Smit SC, bad ïa kine ki kol la thep da u V.Mawsor (27’), N L Nonglait (42’) bad u D.Ryntathiang (52’).
Ka jingjop kaba khraw tam ka long na ka bynta ki khynnah ïalehkai jong ka Umphyrnai SC, kiba la pynjemkhnap haduh 10-1 ïa ka Laitkyrhong SC. U B.Kharkongor (2, 18, 30 & 33’) u la ïoh ban thep saw kol marwei, nangta u T.Sohtun (26’), u R.Dkhar (29’), u B.Nongkhlaw (40’), u D.Nongkhlaw (47’), u S.Umdor (49’) ki la noh synñiang mar shi kol, katba kawei kadei kaba la bakla thep hi da ka liang pyrshah ha ka minit kaba 54.
Ka shi kol jong ka Laitkyrhong la thep da u R.Mylliem (27’).
Ka jingïalehkai ba khatduh la ïohi ïa ka Shillong Lajong FC kaba la jop da 6-0 pyrshah ïa ka Nongrah SC. ïa kine ki kol la thep da u M.Marwein (18’), F.Kharkrang (20’), L.Nongkynrih (23’, 35 & 55’) bad u W.Nongsiej (36’).
