SHILLONG, Naitung 08: Ka Umiew Maw U Sam ka la ïoh mad ïa ka jingjop da 3-2 kol pyrshah ïa ka Lummawbah SC ha ka wat ïakhun Super 8 jong ka Group B ha ka lympung Third Division Football League 2026 ba la pynïaid da ka Shillong Sports Association hynne ka sngi Ba-ar.
Ka Umiew Maw U Sam ka la pynkhihjar nyngkong lyngba u Kularskhem Mawthoh (7’) hynrei dei ka Lummawbah ka la pynïakhaid shuwa ban jam sha ka por shongthait lyngba u Fernando Sohkhlet (40+1’).
Tang 5 minit haba jam sha ka kylla miet ka Umiew Maw U Sam ka la lamkhmat biang ïa ka jingïalehkai da kaba pynkhihjar lyngba u Winjestar Nongbri (45’) bad sa shi sien pat ka Lummawbah ka la jubab da kaba pynïakhaid na ka kol u Edelbert Sun (59’).
Hynrei ha ka khyllipmat ba ka jingïalehkai kan poi sha ka jingïakhaid u Bilistar Sun (80+2’) u la thep ïa ka namtam ban pynskhem ïa ka jingjop na ka bynta ka Umiew Maw U Sam.
Ha kawei pat ka jingïakhun jong ka Relegation Zone jong ka Group B la sakhi ïa ka Kharang SC bad ka Mawlynrei SC kiba la ïa sam mar shi point naba ïakhaid mar shi kol.
Ka Kharang ka la thep lyngba u Donakor Mynsong (17’) katba ka Mawlynrei ka la pynïakhaid lyngba u Shanbok Marboh (37’).
Ka prokram ïalehkai jong ka SSA SRGT 3rd Division Football League 2026 ha kane ka sngi Palei (09.07.2026):
Jaka: SSA Ground: Por- 1PM Pomlakrai SC (vs) Lapalang SC
Jaka: MFA Ground Por- 4PM Iaitylli SC (vs) Lumparing SC
Ka jingïakhun Quarter final jong ka lympung SSA U-20 4th Division Football league 2026 hapdeng ka Laitlyngkot SC bad ka Seila Sap F&CC ka la shah pynsangeh noh namar ka jingjur jong u slap, bad ki nongpynïaid ki la pynkynriah noh ïa ka jingïalehkai ha kaba ïa ka tarik ba thymmai yn sa pynbna shen.
Watla katta ruh ka Quarter kan dang bteng kumba la buh na ka bynta kane ka sngi Palei (09.07.2026) ha kaba ka jingïakhun kan long ha ka por 4 baje nohphai sngi ha SSA Ground hapdeng ka Nongkseh United FC pyrshah ïa ka Weilyngkut Area FCC.
