SSA 1st Division 2025: Bteng ka Nongkseh ïa ka jingjop ba paka ban wanphai biang ha khlieh duh

SHILLONG, Risaw 30: Ka Nongkseh SC ka la wanphai biang ha khlieh duh jong ka miej ha ka lympung ïalehkai First Division Football League 2025 ba la pynïaid da ka Shillong Sports Association hadien ba ka la pynliem noh ïa ka Mawkhar SC da 5-0 kol hynne ka sngi Palei ha madan First Ground-SSA Stadium, Polo.
Ka Nongkseh ka la ïoh ban lamkhmat lypa da ar kol ha ka kylla step lyngba ki kol na u Banpynkhrawnam Nongkhlaw (6’) bad u Chesterpaul Lyngdoh (24’), nangta u Baiaikara Swer (55’), Mebankhraw K Wahlang (65’) bad u Kitboklang Pale (75) ki la pynskhem shuh shuh da kaba thep sa lai kol ha ka kylla miet.
Kine ki lai point ki long kiba kongsan ïa ka Nongkseh, namar ka la pynïoh biang ïa ka kynhun ba kan jam ha khlieh duh jong ka miej da kaba kamai 18 point naki 6 sien ïalehkai. Watla ka ïaryngkat point bad ka MLP, hynrei ka Nongkseh ka don ïa ka jingïapher kol kaba kham bha (da +34 la 17).
Kumba ka paw, ka Nongkseh bad ka MLP, kidei ki ar tylli ki kynhun kiba dang bteng ïa ka jingjop kaba paka ha baroh hynriew tylli ki jingïalehkai ba ki la pyndep mynta ka aïom.
Ka jingïalehkai SSA 1st Division Football league 2025 ha kane ka sngi Thohdieng (31/10/2025) kan sdang ha ka por 1:15 baje mynsngi, hapdeng ka Lawsohtun SC pyrshah ïa ka Nongrah SC.
Hadien kane, ha ka por 5 baje janmiet ka SSA kan sa ïoh ban sdang pat ïa ka jingïakhun Quarter final ba nyngkong jong ka lympung Super Cup hapdeng ka Nangkiew Irat SC pyrshah ïa ka Rangdajied United FC.