Shillong, Nailur 09: Ka Mylliem, kaba don shatrai duh jong ka miej, ka la wanrah ïa ka jingïakhun kaba tyngeh pyrshah ïa ka Shillong Lajong (kaba don jingkyrmen ban ïakhun ïa ka nam lahduh) ha ka Shillong Premier League 2026, da kaba ïakhaid mar 3-3 hynne ka sngi Balang ha SSA Stadium, Polo.
Baroh ar ki la ïoh ban lamkhmat markylliang hynrei ki la hap ban ïasam mar shi point ha kaba kut. U Iohborlang L Lyngkhoi (7′), u Lalmuansanga (65′) bad u Deibormame Tongper (76′) ki la pynkhihjar na ka bynta ka Lajong katba u Wanpynshngain Nongsteng (25′), u Shaibor Nongrum (52′) bad u Istarbor Marngar (70′) ki la thep na ka bynta ka Mylliem.
Na ka bynta ka Mylliem, kane kadei ka point kaba nyngkong ha kane ka samoi hadien ba ka la shah rem saw sien lynter bad ka dei ruh ka jingïalehkai kaba nyngkong eh ha kaba ka Lajong kan shah pynkhihjar haduh lai sien ha ka liang pyrshah ha ka SPL 2026.
Ka Lajong ka la ïohlad ban lamkhmat ïa ka jingïalehkai hadien ba u Iohborlang u la pynkhihjar na ka free kick, kaba ka kynhun ka la ïoh hadien ba u Istarbor jong ka Mylliem u la pynur ïa u Freddy B Jyrwa tang shabar jong u laiñ phyllaw kol (box).
Hadien kane, ka Lajong ka la ïoh ruh bun tylli ki kabu ksiar ban pynkhihjar hynrei kam shym la lah satia ban pynurlong ïa ki. Bad ha ka jaka jong kata, la sakhi pynban ïa ka kol pynïakhaid jong ka Mylliem, ha kaba u Wanpynshngain u la pynkhihjar da kaba pynïasoh tiak da ka khlieh ïa ka bol pashat jong u Remark Kharmalki. Kane ka dei ka kol kaba nyngkong ba ka Lajong kan shah thep ha ki 300 minit jong ka SPL 2026.
Ka Lajong ka la dei ban lamkhmat biang hadien shiphew minit hynrei u rangapkol ka Mylliem u Rihoklang Khongjoh, u la sei madan ïa ka sap ba tbit jong u ban ban khanglad ïa u Colinsalmon Lyngdoh. Ha ka minit kaba 44 ka Lajong ka la pyrkhat ba ka ïoh ban lamkhmat biang ïa ka jingïakhun hynrei ka kol jong u Lalmuansanga ka la shah kyntait namar ka offside.
Ka Mylliem ka la sdang ïa ka kylla miet da kaba tyngeh bad ka la dei ka pali jong ki ban lamkhmat hadien ba u Shaibor u la pynkhih ïa ka kol kaba ar ha ka minit kaba 52.
Wat hapdeng ka jingïalehkai kaba kyrpang na u Wanpynshngain bad u Milancy Khongstia ban ïada ïa ka kut ba skhem jong ka Mylliem, hynrei ki la don pat ki khep ba ka Lajong ka la ïohlad ban ïaid lait kum ha ka por ba u Lalmuansanga u la pynkhihjar da ka khlieh ban pynïakhaid ïa ka jingïalehkai da mar 2-2.
Tang hadien katto katne por u Istarbor u la buh biang hakhmat ïa ka Mylliem shuwa ba ka Lajong kan pynïakhaid sa shi sien lyngba u Deibormame, kaba pynlong ïa kine ki arliang mamla ban ïasam mar shi point.
Na ka bynta ka Lajong, ka shi point ka la kyntiew shi por ïa ki ha khlieh duh jong ka miej, mynta ka la kamai 11 point, hynrei ka Mawlai ka duna tang shi point bad ka dang sah sa kawei ka jingïakhun ha kti.
Ha kane ka sngi Palei, ka Rangdajied United kaba don ha ka kyrdan kaba khyndai kan ïakhun pyrshah ïa ka Laitkor kaba wan ha ka kyrdan kaba phra ha ka por 3:30 baje nohphai sngi.
