Shillong, nailar 27: Ki ar tylli ki kol ba la thep da u Freelyson Tariang ka la ïarap ïa ka Laitkor ban pynliem ïa ka Mylliem da 3-1 kol ha ka Shillong Premier League 2025 (kaba la jam mynta sha ka jingïalehkai kaba shiphew) ha madan First Ground-SSA Stadium, Polo, hynne ka sngi Balang.
Baroh saw tylli ki kol jong kane ka jingïakhun ki la wan ha ka kylla miet, kata na u Freelyson (52′, 76′) bad u Risuk Malngiang (71′) na ka bynta ka Laitkor, katba u Wanbok Wahlang (85′) u la pynphai kawei na ka bynta ka Mylliem.
U Rikmenlang Nongrum u la leh ïa kaba kongsan ban ïoh ïa ka kol kaba nyngkong hadien ba u la pynneh ïa ka bol ha ka jingïalehkai ha ka liang kadiang hadien ba la pynbuh ïa u da u Risuk. U la hap ban pyllait lyngba u nongap kol jong ka Mylliem, u Rihoklang Khongjoh, ban leh ïa kane ka la buh ïa u ha ka jaka kaba khim ban thep kol hynrei u Freelyson u la don ïarap da kaba pyndei tiak ïa ka bol pashat ha syndah jong ka kol.
Kumjuh ruh u Freelyson u la don bynta ban pynkhih ïa ka kol kaba ar. U la kynting ïa ka bol shakhmat bad mareh sawdong ïa uwei u rangïalehkai ba shadien hynrei u la shah lynshop ha u Rihoklang uba la mih shakhmat ban khanglad. Mar ïatyngkhuh ka bol ka la kiar sharud na u rangap kol bad u Risuk u la thep jliaw da kaba suk ïa ka shapoh kol.
Naduh kane ka khyllipmat, ka Mylliem ka la nang pynjur ban pynkhlaiñ shakhmat bad ka Laitkor ka la pyndonkam da ka rukom lehkai kaba stet mar ïa knieh bol (counterattack) ban thep ïa ka kol kaba lai. U Fridison Wahlang u la rah ïa ka bol shaduh phyllaw kol jong ka liang pyrshah bad u la ïoh bun ka por ban rai kumno un leh. Da ka jingsngewthuh jingmut u la jied ban pashat ïa ka bol na ka bynta u Freelyson ban thep ïa ka kol kaba ar jong u bad ban pynjlan ïa ka kol lamkhmat da 3-0.
Une u namtam jong ka Laitkor u la lah dei ban ïoh thep ïa ka hat-trick ha ka minit kaba 80 hynrei la shah khanglad noh ha u Rihoklang.
Hadien san minit, ka Mylliem ka la ïoh ïa ka free-kick tang shabar ka phyllaw kol (box) na liang kamon bad u Wanbok u la lah ban pynpaw madan ïa ka sap shut free kick kaba kyrpang da kaba pynrung beit beit sha kol.
Baroh ar liang ki la jam sha kane ka jingïakhun ryngkat ka jingkyrmen ban ïoh ïa ka jingjop ba nyngkong jong ki ha ka SPL 2025. Ha ka wat ïakhun kaba nyngkong ka Laitkor ka la shah rem noh ha ka Malki da 1-0, katba ka Mylliem ka la ïakhaid bad ka Langsning da mar 1-1 kol.
Ka jingjop ka la kyntiew ïa ka Laitkor na ka thup kyrdan shah sloit (relegation zone) bad jam sha ka kyrdan ba san ha ka miej. Ki kynhun ba la kamai 3 point ki long ka Laitkor, Mawlai, Sawmer bad ka Malki.
Ha ka SPL, lada jia ba ki kynhun ki ïaryngkat point yn bishar nyngkong lyngba ka ‘Head-to-head’ (ka resol ki jingïakhun ba ïakynduh pyrshah), hynrei namar ba baroh saw tylli ki kynhun kim pat shym la ïalehkai kawei ïa kawei pat, te kumta la bishar ban pynïakhlad ïa ki lyngba ka jingïapher ha ki kol (goal difference). Da kane ka rukom ka Mawlai (+2) ka wan hakhmat, nangta bud sa ka Laitkor (+1), Sawmer (-2) bad ka Malki (-4) marïabud. Katba na ka liang jong ka Mylliem, kane ka namrem ka la pynhiar ïa ka sha ka kyrdan ba 8 ha ka miej. Ka ïaryngkat bad ka Rangdajied United da mar 1 point hynrei ka don ka jingïapher kol kaba kham bha (-2 to -4).
Ha kane ka sngi Palei kan dei ka jingïalehkai kaba nyngkong jong ka kylla kaba lai jong ka SPL 2025, ha kaba ka Nangkiew Irat kan aireng pyrshah ïa ka Sawmer ha ka por 4:30 janmiet.
